პირბადის გარეშე დახურულ საჯარო სივრცეებსა და საზოგადოებრივ ტრანსპორტში 15 ივისიდან დაჯარიმდებით

„ადმინისტრაციულ სამართალდარღვევათა კოდექსში“ შეტანილი ცვლილების თანახმად, პანდემიის და ეპიდემიის დროს დახურულ საჯარო სივრცეში პირბადის ტარების წესის დარღვევა გამოიწვევს ფიზიკური პირის დაჯარიმებას 20 ლარით, ხოლო დახურული საჯარო სივრცის მფლობელი იურიდიული პირის ან ინდივიდუალური მეწარმის დაჯარიმებას - 500 ლარით. ინფორმაციას სააგენტო „ინტერპრესნიუსი“ ავრცელებს.

„არსებობს „ადმინისტრაციულ სამართალდარღვევათა კოდექსში“ ჩანაწერი, რომლის თანახმად თუ ფიზიკური პირი პირბადის გარეშე შევა დახურულ საჯარო სივრცეში, ან თუ საზოგადოებრივი ტრანსპორტით, ან ტაქსით იმგზავრებს პირბადის გარეშე, გათვალისწინებულია 20 ლარის ოდენობის ჯარიმა", - განაცხადა „ინტერპრესნიუსთან“ ანრი ოჯახაშვილმა.

მისი თქმით, პირბადის გარეშე მოქალაქემ დახურულ სივრცესა და ტრანსპორტში შესვლა რომ ვერ შეძლოს, ეს საკითხი იურიდიულმა პირებმა და ინდმეწარმეებმა უნდა გააკონტროლონ, წინააღმდეგ შემთხვევაში ისინი 500 ლარით დაჯარიმდებიან.

"ამავე კანონში დავავალეთ მთავრობას, რომ დეტალურად გაწეროს პირბადის ტარების წესი. საუბარი იყო ჯანმრთელობის პრობლემების მქონე ადამიანებზე, შშმ პირებზე, აბიტურიენტებთან შემთხვევაში რა შეიძლება მოხდეს - ეს ყველაფერი უნდა გაწეროს მთავრობამ. შესაბამისად, ეს კანონი იურიდიულად გამოქვეყნდა და ამოქმედდა, თუმცა მისი გამოყენება უკავშირდება ამ წესის ამოქმედებას. ეს წესი უნდა გამოქვეყნდეს ორშაბათს, რომლის საშუალებით, საზოგადოებას მიეწოდება დამატებითი ინფორმაცია, პირბადის ტარების წესი როგორია და მხოლოდ ორშაბათიდან მოხდება ამ კანონის გამოყენებაც,“ - განაცხადა ოხანაშვილმა.

[sknews.ge]