COVID-19-ის პრევენციისთვის ახალციხის ბიუჯეტიდან გამოყოფილი თანხა ჯერ არ გახარჯულა

ფოტო: ახალციხის საკრებულო

ახალციხის მუნიციპალიტეტის საკრებულომ ე.წ საგანგებო ბიუჯეტი 30 აპრილის სხდომაზე დაამტკიცა. რომლის მიხედვითაც, ახალციხის მერიის მიერ მარტსა და აპრილში დაგეგმილი კულტურული და სპორტული ღონისძიებებისთვის განსაზღრული თანხა, 25 000 ლარი მუნიციპალიტეტში კორონავირუსის პრევენციას მოხმარდება.

„საგანგებო ბიუჯეტის“ დამტკიცებიდან ერთი თვის შემდეგ, ახალციხის საკრებულოში ამბობენ, რომ ეს თანხა ჯერ გახარჯული არ არის: „ჯერ არ გაწერილა თანხები, ვინაიდან მინელდა კორონავირუსი საქართველოში. დამატებით კიდევ გვინდა თანხის მოძიება, იმისთვის, რომ ვისაც რამეს შევუძენთ, იყოს მრავალფეროვანი, პროდუქტით დახმარება იქნება თუ სხვა რამ“, - ამბობს საკრებულოს თავმჯდომარე გელა ნოზაძე.

მისივე თქმით, საგანგებო ბიუჯეტის შექმნამდე თვითმმართველობა სოციალურად დაუცველ ოჯახებს პროდუქტებით დახმარა, შესაბამისად, სავარაუდოდ ეს თანხაც სასურსათო პაკეტის შეძენას მოხმარდება.

„მანამდე რაც გვქონდა მობილიზებული თანხები, დაახლოებით 4 000 ბენეფიციარზე იქნა გაწერილი, შევუძინეთ პროდუქტი და ეს თანხებიც ამ საქმეს მოხმარდება“.

ნოზაძის განმარტებით, ბიუჯეტიდან მხოლოდ 25 000 ლარი გამოიყო, ამას გარდა კი იყო შემოწირულობებიც, დაახლოებთ 24 500 ლარი: „მარტო ხელფასი არ არის ეს, ბიზნესმა, კერძო ადამიანებმა ჩარიცხეს“.

[თაკო ფეიქრიშვილი, ახალციხე]