ახალციხის თემის ბიუჯეტს 350 000 ლარი დაემატა, თანხა ვალეს საბავშვო ბაღს მოხმარდება

ახალციხის თემის მიმდინარე წლის ბიუჯეტში მეოთხე ცვლილება შევიდა. ამ დრომდე არსებულ თანხას 350 000 ლარი დაემატა, რომელიც მაღალმთიანი დასახლებების განვითარების ფონდიდან, მთავრობის 2017 წლის 6 აპრილის, #693–ე განკარულების საფუძველზე გამოიყო. გაზრდილი ბიუჯეტი, დღეს, 19 აპრილს, საკრებულოს სხოდმაზე დეპუტატებმა ერთხმად დაამტკიცეს.

ადგილობრივ თვითმმართველობაში ამბობენ, რომ ფონდიდან გამოყოფილი თანხა მთლიანად ვალის #1 საბავშვო ბაგა–ბაღის რეაბილიტაციას მოხმარდება.

„დიდი ბაღია ძალიან და ხარჯთაღრიცხვის შესაბამისად მოითხოვს, რომ თანხა ბოლომდე დაიხარჯოს. გარდა ამისა, 80 000 ლარს ჩვენ საკუთარი სახსრებით ვამატებთ“, – განმარტა ახალციხის მუნიციპალიტეტის საფინანსო–საბიუჯეტო სამსახურის უფროსმა გელა ლომიძემ.

მისი თქმით, ამ ეტაპზე, მთავრობის განკარგულების საფუძველზე, თანხა მხოლოდ ვალის ბაღისთვის გამოიყო.

დღესვე, სხდომაზე დეპუტატებმა კიდევ ერთი საკითხი – თემის 2017 წლის პირველი კვარტლის ბიუჯეტის შესრულების ანგარიში მოისმინეს. გელა ლომიძის თქმით, ამ დროისათვის, შესრულება დაბალია, თუმცა წინა წლის იგივე პერიოდთან შედარებით, შემოსულობების შესრულება 8–9%–ით მეტია.

„შემოსულობები შესრულებულია სხვა შემოსავლების ხარჯზე – მოსაკრებლების, წიაღის შემოსავლი, ბუნებრივი რესურსების – 32%–იანი შესრულება გვაქვს. ძირითადად, მეორე კვარტალში ხდება გადასახადების გადახდა, აქედან გამომდინარე ახლა შესრულება დაბალია. მეორე კვარტალში უფრო სრული იქნება“, – განმარტა გელა ლომიძემ.

[თაკო ფეიქრიშვილი, ახალციხე]