ბორჯომის საკრებულომ ‘საგანგებო ბიუჯეტი’ დაამტკიცა

დღეს, 23 აპრილს ბორჯომის მუნიციპალიტეტის საკრებულომ გეგმიური სხდომა გამართა, სხდომაზე დეპუტატებმა დღის წესრიგით გათვალისწინებული ექვსი საკითხი განიხილეს. ერთ–ერთი საკითხი ქვეყანაში შექმნილი ვითარებიდან გამომდინარე „საგანგებო ბიუჯეტის“ შექმნა იყო.

აღნიშნულ ბიუჯეტში ის თანხა შეიტანეს, რომელიც მიმდინარე წელს კულტურული ღონისძიებებისთვის იყო გამოყოფილი, მაგრამ კორონავირუსის გავრცელების გამო ვერ ჩაატარეს.

„ამ ბიუჯეტში თანხა გადმოვიტანეთ კულტურული ღონისძიებებისთვის განსაზღვრული მუხლიდან. მთლიანობაში ეს თანხა 152 000 ლარს შეადგენს“,– გვითხრა ბორჯომის საკრებულოს თავჯდომარის მოვალეობის შემსრულებელმა, ოთარ არბოლიშვილმა.

არბოლიშვილი ამბობს თანხა პანდემიის დროს გათვილ საჭიროებებს მოხმარდება, თუმცა არ უთქვამს კონკრეტულად რაში დაიხარჯება.

მისი თქმით, თუ ქვეყანაში სიტუაცია მალე დასტაბილურდება, კულტურული ღონისძიებებისთვის გათვლილი თანხის, უკან დაბრუნება პრობლემას არ წამოადგენს.

დღეს ასევე, დამტკიცდა ბორჯომის მუნიციპალიტეტის სამოქმედო ტერიტორიაზე, ტურიზმის განვითარების გენერალური გეგმა. გეგმის განხილვა, მომავალ საკრებულო სხდომაზე განახლდება. რადგან საკრებულოს განცხადებით, არასამთავრობო ორგანიზაციის წევრებმა, ქვეყანაში შექმნილი მდგომარეობის გამო სხდომაზე გამოცხადება ვერ შეძლეს.

[ნუკა სტეფნაძე, ბორჯომი]