‘არც კარგი უნდა დაუკარგო და არც ცუდზე უნდა დაუხუჭო თვალი’ – ახალქალაქის მიტროპოლიტი ენზელ მკოიანზე

„დღეს დიდი კამათია ენზელ მკოიანზე. მე ვუთხარი, რომ შენ რასაც აკეთებ ყველაფერს აკეთებ არჩევნებისთვის–მეთქი. ოღონდ შენი საარჩევნო კამპანია იწყება, მაშინ როგორც კი წინა დასრულდება. მეორე დღიდან, შენ უკვე ფიქრობ შემდეგ არჩევნებზე და მე მივესალმები ასეთ ზრუნვას. თუ ეს არის წინასაარჩევნო კამპანია, რომელიც არჩევნების დასრულებისთანავე იწყება. აბა მეტი რისთვის გვინდა დეპუტატი და სახელმწიფო რომ იზრუნოს ხალხზე“.

წამყვანის კითხვაზე 26 მარტს მომხდარი დაპირისპირების კადრები თუ აქვს ნანახი, მიტროპოლიტმა უპასუხა, „კი, როგორ არა, მე არ ვეთანხმები... მე საერთოდ ასე ვიძახი, რომ ადამიანს არც კარგი უნდა დაუკარგო და არც ცუდზე უნდა დაუხუჭო თვალი. ეგ არ არის ჩემი საქმე, ეს არის კრიმინალური პოლიციის კვლევის საქმე და გამოიკვლიოს ვინ ვის ესროლა“.

მანვე განაცხადა, რომ „პატრიოტთა ალიანის“ წარმომადგენელი სამველ პეტროსიანი ჯავახეთში დამსახურბული პიროვნებაა, ამიტომ მას კარგი დახასიათება დაუწერა.

„ის მეორე პიროვნება რომელიცაა ასევე ჩართული, დამსახურებული ადამიანია ჯავახეთში და მე იმ ადამიანს დახასიათება დავუწერე და რაც კარგი აქვს გაკეთებული ჩამოვთვალე. შეიძლება ადამიანი ერთდროულად დააჯილდოვო კიდევაც და დასაჯო კიდევაც კარგისთვის და ცუდისთვის“,-ამბობს მიტროპოლიტი.

ინციდენტი ახალქალაქის ცენტრში 26 მარტს, დაახლოებით 15:00 საათზე, ენზელ მკოიანის საცხოვრებელ სახლთან მოხდა.

29 მარტს კი „პატრიოტთა ალიანის“ წარმომადგენელი ახალქალაქში, სამველ პეტროსიანი და ენზელ მკოიანის ძმისშვილი დააკავეს. გამოძიება ჯგუფურად ჩადენილი დანაშაულისა და იარაღის მართლსაწინააღმდეგო შეძენა-შენახვა-ტარების მუხლებით მიმდინარეობს.

დაკავებამდე სამველ პეტროსიანმა განაცხადა, რომ მან ვითარების განმუხტვის გამო ჰერში გაისროლა, იგივეს აცხადებს „ქართული ოცნების“ დეპუტატი ენზელ მკოიანიც“. მოგვიანებით მკოიანმა განაცხადა, რომ პეტროსიანი მის მოკვლას ცდილობდა, ამის დასტურად კი სათვალთვალო კამერების მიერ გადაღებული კადრები გაავრცელა.

[მარიამ ბარძიმაძე]