საპრეზიდენტო არჩევნების პერიოდში საარჩევნო ადმინისტრაციაში 417 საჩივარი შევიდა

საქართველოს ცენტრალური საარჩევნო კომისიის ინფორმაციით, საარჩევნო ადმინისტრაციაში შესული 417 განცხადება/საჩივრიდან, ცესკოში - 43, საოლქო/საუბნო საარჩევნო კომისიებში კი 374 განცხადება/საჩივარი შევიდა.

ცესკოში შესული 43 განცხადება/საჩივრიდან, 14 დაკმაყოფილდა, ამდენივე არ დაკმაყოფილდა, 11 ნაწილობრივ დაკმაყოფილდა, 3 განუხილველი დარჩა და 1 უკან გაითხოვეს.

საოლქო/საუბნო საარჩევნო კომისიებში შესული 374 განცხადება/საჩივრიდან, დაკმაყოფილდა 122 , არ დაკმაყოფილდა 141, ნაწილობრივ დაკმაყოფილდა 59, განუხილველი დარჩა 43, უკან გაიტანეს 4 და შესაბამის უწყებებს გადაეგზავნა 5 განცხადება/საჩივარი.


ცესკოში აცხადებენ, რომ საარჩევნო ადმინისტრაციის მონაწილეობით, საანგარიშო პერიოდში, 32 სასამართლო პროცესი გაიმართა. მათ შორის, ცესკოს მონაწილეობით 13, ხოლო საოლქო საარჩევნო კომისიების მონაწილეობით 6 სასამართლო პროცესი.

გარდა ამისა, არჩევნების დანიშვნის დღიდან მის დასრლებამდე, საარჩევნო ადმინისტრაციის მიერ 13 სამართალდარღვევის ოქმი შედგა, რომლებიც გადაეგზავნა შესაბამის რაიონულ/საქალაქო სასამართლოებს, ადმინისტრაციული საქმეების განსახილველად. უნდა აღინიშნოს, რომ ამ 13 ოქმიდან არცერთი არ შემდგარა სამცხე-ჯავახეთის საარჩევნო ოლქებში.

საოლქო საარჩევნო კომისიების მიერ გაბათილდა 3 საარჩევნო უბნის შედეგი: №2 ვაკის საოლქო საარჩევნო კომისიის №80 საარჩევნო უბნის, №59 ქუთაისის საოლქო საარჩევნო კომისიის №65 საარჩევნო უბნისა და №81 ქობულეთის საოლქო საარჩევნო კომისიის №65 საარჩევნო უბნის. ასევე, საოლქო კომისიების მიერ გაბათილდა 5 საარჩევნო უბნის გადასატანი ყუთის შედეგი.

8 საუბნო საარჩევნო კომისიის საარჩევნო ბიულეტენები გადაითვალეს საოლქო საარჩევნო კომისიების გადაწყვეტილებით. სასამართლოს გადაწყვეტილებით, კი, №22 მარნეულის საოლქო საარჩევნო კომისიას დაევალა 3 საარჩევნო უბნის საარჩევნო ბიულეტენების ხელახლა დათვლა.

[sknews.ge]