პარლამენტმა თვითმმართველი ქალაქების შემცირებას მხარი დაუჭირა

„ადგილობრივი თვითმმართველობის კოდექსში“ შესატანი ცვლილებების მიხედვით, თვითმმართველი ქალაქების რაოდენობა 12-დან 5-მდე შემცირდება და ასეთი სტატუსი მხოლოდ თბილისს, ქუთაისს, რუსთავს, ფოთსა და ბათუმს ექნება. 7 თვითმართველი ქალაქი და თვითმმართველი თემი გაერთიანდება და ერთ მუნიციპალიტეტად ჩამოყალიბდება.

მთავრობის მიერ ინიცირებული კანონპროექტი დეპუტატებს რეგიონული განვითარებისა და ინფრასტრუქტურის მინისტრის მოადგილემ, კახაბერ გულედანმა წარუდგინა.

„შემოთავაზებული ცვლილებით, მუნიციპალიტეტის აღმასრულებელ ორგანოდ ყველა მუნიციპალიტეტში განისაზღვრება „მერი“ , ხდება „გამგებლის“ ამოღება. ტერიტორიული ოპტიმიზაციის შედეგად დაიზოგება და გამოთავისუფლდება თანხები, რომელიც რეგიონულ ინფრასტრუქტურულ პროექტებზე მიიმართება. მუნიციპალიტეტებს მეტი რესურსით და მეტი სერვისით სარგებლობის საშუალება მიეცემათ, რაც დეცენტრალიზაციის მნიშვნელოვან ფაქტორს წარმოადგენს“, - განაცხადა რეგიონული განვითარებისა და ინფრასტრუქტურის მინისტრის მოადგილემ, კახა გულედანმა კანონპროექტის პარლამენტის სხდომაზე წარდგენისას 14 ივნისს.

კანონპროექტს მხარი არ დაუჭირეს საპარლამენტო უმცირესობის წარმომადგენლებმა. თვითმმართველი ქალაქების შემცირება მათ სწორ გადაწყვეტილებად არ მიაჩინიათ.

[sknews.ge]