რა შედეგით დასრულდა NGO-ების შეხვედრა პარლამენტის თავმჯდომარესა და მინისტრთან თვითმმართველი ქალაქების საკითხზე

შეხვედრას “საერთაშორისო გამჭვირვალობა – საქართველოს” ზუგდიდის ოფისის კოორდინატორი არჩილ თოდუა და ორგანიზაცია “საუნჯეს” წარმომადგენელი ეგნატე შამუგია ესწრებოდნენ. როგორც არჩილ თოდუამ განაცხადა, შეხვედრა კონკრეტული შედეგის გარეშე დასრულდა: “კარგია, რომ შეხვედრა ჩატარდა, თუმცა მას კონკრეტული შედეგი არ ჰქონია. გავცვალეთ შეხედულებები ამ საკითხთან დაკავშირებით. ყველა დავრჩით ჩვენს პოზიციაზე. მინისტრსა და პარლამენტის თავმჯდომარეს მიაჩნიათ, რომ უნდა მოხდეს მუნიციპალიტეტების გამსხვილება. ჩვენ არასამთავრობო ორგანიზაციებს მიგვაჩნია, რომ არ უნდა მოხდეს”.

შეხვედრა არასამთავრობო ორგანიზაციების ინიციატივით გაიმართა. მათ შესაბამისი თხოვნით რეგიონული განვითარების სამინისტროს თავად მიმართეს.

თვითმმართველობებში განსახორციელებელ ცვლილებებთან დაკავშირებით პარლამენტის ბიურომ უკვე დაარეგისტრირა საკანონმდებლო ცვლილებების პაკეტი. დოკუმენტის თანახმად თვითმმართველი ქალაქების რაოდენობა 12-დან 5-მდე შემცირდება. კერძოდ, თვითმმართველი ქალაქის სტატუსი – თბილისს, რუსთავს, ქუთაისს, ფოთსა და ბათუმს შეუნარჩუნდება. საკანონმდებლო ცვლილებების პაკეტი, რომლის ავტორიც რეგიონალური განვითარებისა და ინფრასტრუქტურის სამინისტროა, ცვლილებების შეტანას 20 კანონში ითვალისწინებს.

[sknews.ge]