სამცხე–ჯავახეთში კარანტინში მყოფი პირების მასობრივი PCR ტესტირება 11 მაისიდან დაიწყება

როგორც, ჯანდაცვის სამინისტროს პრესსამსახურში განგვიცხადეს, მოქალაქეებს COVID-19-ზე ანალიზს ადგილზე, საკარანტინო სივრცეში აუღებენ და ბიოლოგიურ მასალას ლაბორატორიაში გადააგზავნიან.

„საკარანტინო სივრცეში გადამზადებული პერსონალია, ისინი აიღებენ ნაცხის და სისხლის ანალიზს კარანტინში მყოფი მოქალაქეებისგან, ეპიდემიოლოგები კი მასალას წაიღებენ ლაბორატორიებში. სადაც გაკეთდება ტესტი“, – გვითხრეს ჯანდაცვის სამინისტროს პრესსამსახურში.

ამ დრომდე საკარანტინო ზონებში, საქართველოს მასშტაბით, მასობრივი ტესტირება არ ჩატარებულა. კორონავირუსზე ამოწმებდნენ მხოლოდ იმ პირებს, რომლებსაც ვირუსისთვის დამახასიათებელი სიმპტომები აღენიშნებოდათ.

ახალციხის საზოგადოებრივი ჯანდაცვის ცენტრის ხელმძღვანელი, ფატი ხაბულიანი ამბობს, პრევენციის მიზნით, ახალციხის საკარანტინო ზონაში კორონავირუსზე აქამდეც ყველას ამოწმებდნენ.

ჯანდაცვის მინისტრის მოადგილის, თამარ გაბუნიას განცხადებით, 11 მაისიდან კარანტინში მყოფი პირების სავალდებულო PCR ტესტირება იწყება. ეს გადაწყვეტილება სამინისტრომ მას შემდეგ მიიღო, რაც გაირკვა, რომ საკარანტინო სივრცეებში მოთავსებული პირების დიდ ნაწილს, ვირუსი სწორედ მეცამეტე–მეთოთხმეტე დღეს დაუფიქსირდათ.

სამცხე–ჯავახეთში ამ დროისთვის ექვს საკარანტინო ზონაში მყოფი პირების კოვიდინფიცირების ხუთი შემთხვევაა დაფიქსირებული.

ამ ეტაპზე რეგიონის მასშტაბით, სავალდებულო ორკვირიან კარანტინში 398 მოქალაქე იმყოფება. აქედან ოთხი ახალციხის საკარანტინო ზონაში სასტუმრო „გრანდ პალასში“ რჩება, ხოლო 394 პირი ბაკურიანში არსებულ ხუთ სასტუმროშია გადანაწილებული.

[ნუკა სტეფნაძე, ახალციხე]