ბორჯომის ხეობაში ტყეების აღდგენა დაიწყო

გაეროს განვითარების პროგრამა (UNDP), გარემოსა და ბუნებრივი რესურსების დაცვის სამინისტრო და სსიპ ეროვნული სატყეო სააგენტო ბორჯომის ხეობაში 2008 წლის აგვისტოს კონფლიქტის შედეგად განადგურებული ტყეების აღდგენას იწყებენ. წიწვოვანი და შერეული ტყის საფარის აღსადგენად, 16 ჰექტარზე მეტ ფართობზე, 22,500 სხვადასხვა სახეობის ნერგი დაირგვება.

როგორც გარემოს დაცვის სამინისტროში აცხადებენ, მოსამზადებელი სამუშაოები ორი თვის წინ, 2013 წლის სექტემბერში დაიწყო. დამწვარი ხის ნარჩენებისა და ბუჩქებისგან 120 ათასი კვადრატული მეტრი გაიწმინდა, ნიადაგი მომმზადდა ნერგების დასარგავად და თესლის დასათესად. ამ დროისთვის უკვე დარგულია 17 ათასი ნერგი და დათესილია 60 კგ თესლი.

ინიციატივა საქართველოს მთავრობის, ფინეთის მთავრობისა და გაეროს განვითარების პროგრამის (UNDP) მხარდაჭერით ხორციელდება.

ამასთან დაკავშირებით, ხვალ, 12 ნოემბერს, 11:00 საათზე, ბორჯომის მუნიციპალიტეტის სოფელ დაბას გარემოსა და ბუნებრივი რესურსების დაცვის მინისტრი ხათუნა გოგალაძე, გაეროს განვითარებს პროგრამის (UNDP) ხელმძღვანელი საქართველოში ნილს სკოტი და ფინეთის ელჩი საქართველოში ქრისტერ მიხელსონი ეწვევიან. ღონისძიებას აგრეთვე დაესწრებიან ბორჯომის გამგებელი დიმიტრი ბერიძე, საქართველოს საპატრიარქოს წარმომადგენლები, თავდაცვის ეროვნული აკადემიის კურსანტები და კადეტთა ლიცეუმის კადეტები.

[SKnews.ge]