პანდემიის დასრულება შორსაა - ჯანმო

ამის შესახებ ჯანდაცვის მსოფლიო ორგანიზაციის გენერალურმა დირექტორმა, ტედროს ადჰანომ გებრეიესუსმა 27 აპრილის მედია ბრიფინგზე განაცხადა.

„მაშინ, როდესაც ევროპაში ახალი შემთხვევების შემცირებასთან ერთად შეზღუდვების შერბილება იწყება, კვლავ მოვუწოდებთ ქვეყნებს, კორონავირუსის ყველა შემთხვევა გამოავლინონ, მათი იზოლირება, ტესტირება და მკურნალობა განახორციელონ, რათა შემცირების ტენდენცია გაგრძელდეს. თუმცა, პანდემია შორსაა დასრულებისგან. ჯანმო კვლავ შეშფოთებულია აფრიკაში, აღმოსავლეთ ევროპაში, ლათინურ ამერიკასა და აზიის ზოგიერთ ქვეყანაში ახალი შემთხვევების ზრდის გამო. ამასთან, ბევრ რეგიონში ვირუსის შედეგად გარდაცვლილთა ნაწილი აღრიცხული არ არის, რადგან ბევრ ქვეყანაში ტესტირების მცირე შესაძლებლობა აქვთ“, - განაცხადა ჯანმოს გენერალურმა დირექტორმა.

გებრეიესუსის ინფორმაციით, პანდემიის გამო საზღვრებზე დაწესებულმა შეზღუდვებმა უკვე 21 ქვეყანაში სხვა დაავადებების საწინააღმდეგო ვაქცინების უკმარისობა გამოიწვია.

კრიზისის გამო, მსოფლიოში ვაქცინაციის 14 კამპანია გადაიდო, რომელსაც 13 მილიონზე მეტი ადამიანი უნდა მოეცვა. გებრეიესუსმა განაცხადა, რომ ვაქცინაცია, რომელიც ვერ ჩატარდა, მიმართული იყო პოლიომიელიტის, წითელას, ქოლერას, პაპილომავირუსის, ყვითელი ცხელებისა და მენინგიტის წინააღმდეგ.

მისივე თქმით, კორონავირუსის დამარცხება ვერ მოხერხდება, თუ მსოფლიო გაერთიანებული არ იქნება.

„ეროვნული ერთიანობა გლობალური სოლიდარობის საფუძველია. სოლიდარობა, სოლიდარობა, სოლიდარობა - ეს არის ის, რასაც ჩვენ ყოველდღე ვამბობთ“, - აცხადებს ტედროს ადჰანომ გებრეიესუსი.

[თაკო ფეიქრიშვილი]