ჯანმო: კორონავირუსის წინააღმდეგ ვაქცინის პირველი ტესტირება დაიწყო

„ვაქცინის პირველი ტესტირება დაიწყო სულ რაღაც 60 დღეში მას შემდეგ, რაც ვირუსის გენეტიკური თანმიმდევრობა ჩინეთმა გაგვიზიარა. ეს წარმოუდგენელი მიღწევაა. გვსურს, შევაქოთ მკვლევრები მსოფლიოს მასშტაბით იმისთვის, რომ სისტემატიურად ახორციელებდნენ ექსპერიმენტალური მედიკამენტების შეფასებას“, - განაცხადა ჯანმოს გენერალურმა დირექტორმა ტედროს ადჰანომ გებრეიესუსმა.

მისი თქმით, მთელი მსოფლიოდან შეკრებილი მკვლევარები ექსპერიმენტულ თერაპიებს სისტემატურად აფასებენ.

„ჩვენ ამას „სოლიდარობის გამოცდას“ ვუწოდებთ, რომელიც გამარტივებულ პროცედურებს ითვალისწინებს, რომ გადატვირთულმა საავადმყოფოებმაც კი მიიღონ მონაწილეობა. ბევრმა ქვეყანამ უკვე დაადასტურა, რომ ისინი შეუერთდებიან „სოლიდარობის გამოცდას“. ჯანდაცვის მსოფლიო ორგანიზაცია კვლავ მოუწოდებს ქვეყნებს განახორციელონ ყოვლისმომცველი მიდგომა, რომ შემცირდეს კორონავირუსის გავრცელება. ეს მიდგომა ეხმარება სიცოცხლის გადარჩენას და ყიდულობს დროს, ვაქცინის შემუშავებისთვის და მკურნალობისთვის. ეს კორონავირუსი წარმოადგენს უპრეცედენტო საფრთხეს. მაგრამ ეს არის ასევე უპრეცედენტო შესაძლებლობა, რომ გავერთიანდეთ საერთო მტრის წინააღმდეგ“, – აღნიშნა ჯანდაცვის მსოფლიო ორგანიზაციის ხელმძღვანელმა.

ჯანდაცვის მსოფლიო ორგანიზაცია არ გამორიცხავს, კორონავირუსი ბავშვებში მძიმედ განვითარდეს.

„ბავშვების დიდი ნაწილი, რომლებიც დაავადდებიან, დაავადებას გადაიტანენ იოლი ფორმით, მაგრამ ეს არ არის უნივერსალური. ჩვენ ვიცით იმის შესახებ, რომ ჩინეთში რამდენიმე ბავშვმა დაავადება მძიმედ გადაიტანა და ერთი ბავშვი გარდაიცვალა. ამგვარად, უნდა მოვემზადოთ, რომ ბავშვებს, შესაძლოა, ჰქონდეთ დაავადების მძიმე ფორმა, მაგრამ, მთლიანობაში, ისინი მას იოლად იტანენ “, – ამის შესახებ ჟენევაში გამართულ პრესკონფერენციაზე ორგანიზაციის საგანგებო დაავადება ქვეგანყოფილების ხელმძღვანელმა მარია ვან კერკჰოვემ განაცხადა.

16 მარტს აშშ-ში მეცნიერებმა მოხალისეზე კორონავირუსის ვაქცინა დატესტეს.

[sknews.ge]