თვითდასაქმებულები 300 ლარიანი დახმარების მისაღებად სპეციალურ ბაზაში უნდა დარეგისტრიდნენ

ერთჯერადად 300 ლარს ის მოქალაქეები მიიღებენ, რომლებმაც სამსახური ქვეყანაში კორონავირუსის გავრცელების შემდეგ დაკარგეს.

"არაფორმალურად დასაქმებულების შემთხვევაში ძალიან რთულია იმ პირების დაიდენტიფიცირება, რომლებიც თავს თვითდასაქმებულებად თვლიან. ვინაიდან ძალიან მწირი არის მათ შესახებ ინფრომაცია, ამიტომ იხსნება ონლაინ პორტალი რეგისტრაციისთვის, სადაც ისინი ძალიან მარტივად მოახდენენ თვითრეგისტრირებას და საბუთებით უზრუნველყოფას.თუ რა ტიპის საბუთები იქნება მოთხოვნილი და რამდენად რთული იქნება ამ საბუთების მოძიება, ამასთან დაკავშირებით ჩვენ დამატებით ინფორმაციას მივაწვდით ჩვენს მოსახლეობას, მას შემდეგ, რაც დეტალურად შემუშავდება კრიტერიუმები", - განაცხადა თამარ ბარკალაიამ ტელეკომპანია "იმედის" ეთერში.

მისი თქმით რეგისტრაციისთვის მარტივი კრიტერიუმები იქნება: "მოქალაქე, რომელიც დაასაბუთებს რომ მას დაეკარგა შემოსავალი, ეს იქნება ბანკის ანგარიშის წარდგენით, თუ სხვა ნებისმიერი იურიდიული დოკუმენტით, მას ექნება საშუალება გაიაროს რეგისტრაცია და მიიღოს 300 ლარიანი დახმარება".

პრემიერ–მინისტრმა გიორგი გახარიამ ანტიკრიზისული ეკონომიკური გეგმა საზოგადოებას 24 აპრილს წარუდგინა.





[sknews.ge]