ვის არ ეხება 4 დიდ ქალაქში შესვლისა და გამოსვლის აკრძალვა

მუნიციპალიტეტებში შესვლა შეეძლებათ იმ მოქალაქეებს, რომლებიც ამავე მუნიციპალიტეტებში არიან რეგისტრირებულები, თუმცა ისინი ტერიტორიას 10 დღის განმავლობაში ვეღარ დატოვებენ. ტერტორიის დატოვება მხოლოდ იმ მოქალაქეებისთვის იქნება დასაშვები, რომლებიც სხვაგან არიან რეგისტრირებულები.

მთავრობის N242 დადგენილების მიხედვით შეზღუდვა არ ეხება:

✔ სამედიცინო დაწესებულების თანამშრომლების სამსახურებრივი საქმიანობიდან გამომდინარე გადაადგილებას;

✔ საერთაშორისო და ადგილობრივ სატვირთო გადაზიდვებს;

✔ საქართველოში აკრედიტებული დიპლომატიური კორპუსის წარმომადგენლების სამსახურებრივი საქმიანობიდან გამომდინარე გადაადგილებას;

✔ ბრალდებულების/მსჯავრდებულების გადაყვანას;

✔ ფულადი სახსრების, ძვირფასი ლითონებისა და სხვა ფასეულობათა ინკასირებას;

✔ ელექტროენერგიის, ბუნებრივი გაზის, წყლის წარმოების/გადაცემის/განაწილების/მიწოდების, ასევე სატელეკომუნიკაციო, საფოსტო და ნარჩენების მართვასთან დაკავშირებული მომსახურების მიწოდების მიზნით გადაადგილებას;

✔ სამომსახურეო სარკინიგზო მიმოსვლის მიზნით გადაადგილებას;

✔ მედია საშუალებების წარმომადგენელთა ჟურნალისტური საქმიანობის განხორციელების მიზნით გადაადგილებას;

✔ სარიტუალო მომსახურების გაწევის მიზნით გადაადგილებას (მიცვალებულის გადასვენება/დაკრძალვა);

✔ საერთაშორისო ორგანიზაციების ჰუმანიტარული მიზნებისთვის გადაადგილებას;

✔ კერძო დაცვითი საქმიანობის განხორციელების მიზნით გადაადგილებას;

✔ საჯარო დაწესებულებებისა და ამ დადგენილებით დაშვებული ეკონომიკური საქმიანობების განმახორციელებელი სუბიექტების მიერ ოპერაციულ შტაბთან შეთანხმებულ სიაში მყოფ პირებს/ავტოსატრანსპორტო საშუალებებს, რომელთა გადაადგილებაც კრიტიკულად აუცილებელია საგანგებო მდგომარეობის დროს სამსახურებრივი მოვალეობის შესასრულებლად;

პრემიერ–მინისტრის, გიორგი გახარიას განცხადებით, ქვეყანა კორონავირუსის სრულმასშტაბიანი შიდა გავრცელების ეტაპზე გადავიდა, რის გამოც საქართველოს ოთხ დიდ ქალაქში – თბილისში, რუსთავში, ბათუმსა და ქუთაისში ყველა სახის ტრანსპორტით შესვლა და გამოსვლა დღეს, 15 აპრილის 21:00 საათიდან 10 დღით აიკრძალა.

საქართველოში კორონავირუსის პირველი შემთხვევა 26 თებერვალს დადასტურდა.

ქვეყანაში ამ დროისთვის 306 დადსტურებული შემთხვევაა აქედან 69 გამოჯანმრთელდა, სამი კი გარდაიცვალა.

ვირუსის გავრცელების გამო, 21 მარტიდან ქვეყანაში მოქმედებს საგანგებო მდგომარეობა, 31 მარტიდან კი საყოველთაო კარანტინი და ე.წ კომენდანტის საათი გამოცხადდა. დღის განმავლობაში იკრძალება სამზე მეტი ადამიანის შეკრება, 21:00–დან 06:00 საათამდე კი აკრძალულია გადაადგილება.

[sknews.ge]