ადიგენის მუნიციპალიტეტის სოფელ არლის მკვიდრს სოფო აფრიამაშვილს ჯერ არცერთი ყანა არ მოუხნავს. თუმცა ამბობს, რომ სოფელში ტექნიკის პრობლემა არ არის და ნაკვეთის მოხვნა არ გაუჭირდება.
მისმა მეზობელმა თამარ აფრიამაშვილმა ჯერ ის ნაკვეთი მოხნა, სადაც ტრაქტორი მუშაობდა: „მიწა მოსახნავი კიდევ დაგვრჩა, მაგრამ ჯერ ვაშლის მოკრეფას ვჩქარობთ. როგორც ვიცი, სოფელში ტექნიკა საკმარისია და თუ რიგში ჩვდგებით საშემოდგომოდ მიწის მოხვნას ყველა მოვასწრებთ“.
ჯერ ნაკვეთი საშემოდგომოდ არც ახალციხის მუნიციპალიტეტის სოფელ წნისის მკვდირს, სერგო ჩახოიანს დაუმუშავებია, თუმცა ამბობს, რომ საშემოდგომოდ მიწას ყოველთვის ხნავს და გამონაკლისი არც წელს იქნება. თუმცა, მის საკუთრებაში არსებული 2 ჰა მიწის ნაკვეთიდან იგი წელს მხოლოდ 65 მეასედს დაამუშავებს და ყველაფერს: სიმინდს, ლობიოს, კარტოფილს, ხახვსა და ნიორს, აქ დათესავს.
„სერვის ცენტრის ტრაქტორით მოვხნავ. ვფიქრობ, რომ არ იქნება პრობლემა“, - ამბობს ჩახოაიანი.
სერვის ცენტრის ტრაქტორით უკვე დაამუშავა ნაკვეთის ნაწილი ამავე სოფლის მკვიდრმა მევლუდი გოგოლაძემ: „2 ჰა მიწა მაქვს. ჯერ ნახევარი ჰექტარი მოვხანი და დანარჩენასც მოვხნავ“.
გოგოლაძე ამბობს, რომ ბოლო დროს სოფელში ტექნიკის პრობლემა აღარ არის და თუ რიგში ჩადგები, სერვის ცენტრიდან გამოძახებული ტრაქტორი შენამდე აუცილებლად მოვა, ოღონდ ერთი პირობით: „ყველამ ერთ დღეს და ერთად არ უნდა მოინდომოს მიწის მოხვნა. ეხლა თუ დაიწყებენ ხვნას ყველას ეყოფა, მაგრამ ზამთარში, როცა ყველა მოსწრებაზეა ტექნიკა სოფელს ვეღარ წვდება“.
გოგოლაძე წელს ტარიფითაც კმაყოფილია: „შარშან მეასედის მოხვნა 1,60 გვიჯდებოდა, წელს 1,45 ლარია“.
სამცხე-ჯავახეთის სერვისცენტრში 74 ტრაქტორი ჰყავთ. მათ შორის 8 ერთეული წელს, მაისში დაემატა. 8 ახალი ტრაქტორიდან ამჟამად 5 ადგილზე, 2 ადიგენში და 1 ახალქალაქის მუნიციპალიტეტის სოფელ კოთელაშია".
სერვის ცენტრში აცხადებენ, რომ ტექნიკა საკმარისია, თუმცა მხოლოდ იმ შემთხვევაში, როცა მოხვნას ყველა სოფელში ერთად არ ითხოვენ.
„აგრო ვადების გამო, ხშირად ტექნიკის საჭიროება ყველგან ერთდროულად ჩნდება, ან გლეხები გამოდარებას ელოდებიან და ამ დროს ტრაქტორების რაოდენობა ყველა სოფელს ნამდვილად ვეღარ წვდება“, - ამბობს მექანიზაციის სერვისცენტრის მმართველის დროებით მოვალეობის შემსრულებელი კახა ჩინჩალაძე და ამატებს, რომ თუ დაემატება სერვის ცენტრს ტრაქტორები უკეთესი იქნება.
მისი განმარტებით ამჟამად ადგილზე 20 ტრაქტორია. დანარჩენი ტექნიკა კი რეგიონის სხვადასხვა მუნიციპალიტეტებშია განაწილებული: „მაგალთად 9 ტრქტორი ადიგენშია გაგაზავნილი და იქ 2 ჯგუფად მუშაობს. 30-მდე ტექნიკაა ჯავახეთში. ახლა ტრაქტორებს იყენებენ სახნავად, ასევე მარცვლეულის სათესად, დადისკვისთვის“.
რაც შეეხება მაღალმთიან სოფლებს, იმისთვის რომ გზის გამო საჭიროების შემთხვევაში იქ ტრაქტორს მისვლა არ გაუჭირდეს, აქ რამდენიმე ერთეულ ტექნიკას მუდმივად ტოვებენ.
„მაგალითად ბოგაში სვირსა და ტატანისში ერთი ტრაქტორი სულ დგას და წვდება სამივე სოფელს. რაც შეეხება ადიგენის მაღალმთიან სოფლებს, აქ ძირითადად მეცხოველეობას მისდევენ და შესაბამისად მიწასაც ნაკლებად ამუშავებენ“, - გვიხსნის ჩინჩალაძე.
სერვისცენტრში ტრაქტორების დამატებამ რომ რეგიონში ტექნიკის პრობლემა თითქმის გადაჭრა, ამაზე ახალციხის სასოფლო-საკონსულტაციო სამსახურის უფროსი გურამ ჯინჭველაძეც საუბრობს: „გასულ წლებთან შედარებით წელს გაზაფხულზეც და შემოდგომითაც მიწის მეტი ფართობი მოიხნა. გაუმჯობესდა ხვნის ხარისხიც, რადგან სხვადასხვა ტიპის აგრეგატებია შემოსული. ტექნიკა ახლა უფრო ხელმისაწვდომია და გლეხები მეზობლებზე აღარ არიან დამოკიდებულები, რომ ის 30 წლის ტრაქტორს დილით ან დაქოქავს და ან არა“.
ჯინჭველაძის განმარტებით, საშემოდგომო ხვნა უკეთესი მოსავლისთვის აუცილებელია: „ფესვი თუ მყარ მასას მოხვდა ის სიღრმეში ვერ განვითარედბა. შესაბამისად გვალვის დროსაც მალე გახმება“.
სამცხე-ჯავახეთში საშემოდგომო ხვნა სექტემბრიდან იწყება და 20 დეკემბრამდე გრძელდება.
sknews.ge