ახალციხეში ‘შვიდგზის ზეთისცხება’ ტაძრის ეზოში სრულდება [ფოტო]

„სამხრეთის კარიბჭეს“ მორწმუნეებმა განუცხადეს, რომ „შიშის გრძნობა არ აქვთ“ და რომ რეკომენდებულ 1.5 მეტრიან დისტანციას მაინც იცავენ.

სასულიერო პირი კი განმარტავს, რომ უსაფრთხოების ნორმებს იცავენ, ხატებს კი „ვარდის წყლით“ და სპირტით ასუფთავებენ.

საქართველოში კორონავირუსის გავრცელების გამო, საგანგებო მდგომარეობაა გამოცხადებული, აკრძალულია 10 პირზე მეტის შეკრება. ღვთისმსახურება შეაჩერეს საქართველოში მოქმედმა სხვა რელიგიური კონფესიების წარმომადგენლებმა.

მიუხედავად დიდი რისკისა, მართმადიდებლურ ტაძრებში მრევლი მაინც დადის, ასევე სრულდება წირვა– ლოცვა. საპატრიარქოს გდაწყვეტილებით, დიდი ხალხმრავლობის თავიდან ასაცილებლად, ტაძრებში (განსაკუთრებით მცირე ზომისაში) მსახურებები, ღია ცის ქვეშ ტარდება. მოძღვრებს კი ლოცვა-კურთხევა ეძლევათ, წირვა-ლოცვაზე და 7-გზის ზეთისცხებისთვის მრევლი გადაანაწილონ კვირის სხვადასხვა დღეებში.

აღნიშნულმა გადაწყვეტილებამ საზოგადოების ნაწილის კრიტიკა გამოიწვია. რის გამოც საპატრიარქომ განცხადება გაავრცელა, სასულიერო პირების განმარტებით, „ჩნდება განცდა, რომ ხელოვნურად მზადდება საზოგადოებრივი აზრი, რათა მომავალში შექმნილ შესაძლო პრობლემების მიზეზად ეკლესია გამოცხადდეს“.

საპატრიარქოს განცხადებას საქართველოს მართლმადიდებელი ეკლესიის სასულიერო პირთა და თეოლოგთა ნაწილი გამოეხმაურა.

„რწმენა, რომელზეც განცხადებაშია საუბარი, ან აბსოლუტურია ან არ არის. თუ აბსოლუტურია, მაშინ არც ორ მეტრიანი დისტანციის დაცვა არის საჭირო, არც რისკ-ჯგუფებში შემავალი პირებისათვის სახლში დარჩენის მოწოდება“, - აღნიშულია ღია წერილში, რომელსაც ხელს 16 სასულიერო პირი და 11 თეოლოგი აწერს.



[sknews.ge]