‘ტაძარში უფრო ნაკლები ხალხია, ვიდრე ტრანსპორტში, აფთიაქებსა და მაღაზიებში’ - საპატრიარქო

ასე უპასუხა საპატრიარქომ დღევანდელ განცხადებაში კრიტიკას იმის გამო, რომ ეკლესიამ ამ დრომდე არ შეცვალა ერთი კოვზიდან ზიარების პრინციპი და განაგრძობდა საჯარო ღვთისმსახურებას.

განცხადება ახალ კორონავირუსთან დაკავშირებით საპატრირქომ 25 მარტს გაავრცელა.მასში ასევე ნათქვამია, რომ ეკლესიისთვის გაუგებარია, თუ რატომ კეთდება საზოგადოების მხრიდან აქცენტი საეკლესიო მსახურებაზე, მაშინ როდესაც „ტაძარში მრევლის რაოდენობა ბევრად ნაკლებია, ვიდრე, მაგალითად, გადაუდებელი აუცილებლობის გამო საზოგადოებრივ ტრანსპორტში (ავტობუსი, მეტროპოლიტენი), სააფთიაქო ქსელში ან სურსათის მაღაზიებში ყოველდღიურად მისულ მოქალაქეებთან შედარებით“.

„განსაკუთრებულად უპირისპირდებიან ზიარების ათასწლოვან პრაქტიკას მაშინ, როდესაც ასეთი პოზიციის მქონეთა უმრავლესობას არა აქვს სათანადო ცოდნა ან რწმენა აღნიშნული საიდუმლოს სულიერი მნიშვნელობისა.

ერთი ბარძიმიდან ზიარება მრევლის ქრისტესთან და ერთმანეთთან ერთობის და სიყვარულის უმაღლესი დადასტურებაა, ხოლო ვინც ამაზე ამბობს უარს, უარს ამბობს მაცხოვარზე!“ - ნათქვამია განცხადებაში.

2020 წლის 20 მარტის სინოდის სხდომაზე საპატრიარქომ საჯარო ღვთისმსახურებისა ზიარების წესის შეცვლაზე უარი თქვა, რის გამოც საზოგადოების ნაწილის კრიტიკა გამოიწვია. გასულ კვირას ტაძრებში ჩვეულებრივ შესრულდა ღვთისმსახურება, სასულიერო პირების თქმით, მრევლის ნაწილი წირვას ეკლესიის ეზოში უსმენდა და დისტანციის დაცვასაც ცდილობდნენ, თუმცა ერთი კოვზიდან ზიარების პრინციპი არ შეცვლილა.

35 მარტის დილის მონაცემებით, საქართველოში კორონავირუსის 73 დადასტურებული შემთხვევაა, გამოჯანმრთელებულია 10 ადამიანი. ჩაკეტილია და საკარანტინო ზონებადაა გამოცხადებული მარნეულისა და ბოლნისის მუნიციპალიტეტები. ქვეყანაში საგანგებო მდგომარეობის ფარგლებში ამოქმედებულია შეზღუდვები: შეწყვეტილია საქალაქთშორისო ტრანსპორტის მოძრაობა, გაჩერდა მიკროვატობუსები, აკრძალულია ქორწილებისა და ქელეხების გამართვა და 10 კაცზე მეტის შეკრება დახურულ სივრცეში.

უფრო ვრცლად საპატრიარქოს განცხადების შესახებ წაიკითხეთ აქ

[sknews.ge]