მარნეულიდან გადმოყვანილ 14 დღის ჩვილს კორონავირუსი არ დაუდასტურდა - კლინიკა

საუნივერსიტეტო კლინიკის კლინიკური დირექტორის, ლალი ტურძელაძის განმარტებით, ბავშვის მდგომარეობა საშუალო სიმძიმისაა. დედას კი ტემპერატურა არ აღენიშნება: „14 დღის ბავშვის მდგომარეობა გაცილებით უკეთესია, დინამიკა ძალიან დადებითია. როცა შემოვიდა კრიტიკული მდგომარეობა იყო. ბაბუა რეკავს ამ ბავშვთან დაკავშირებით, და გვითხრა, რომ დედის მდგომარეობა უკეთესია. დედას ტემპერატურა არ აქვს და თავს უკეთესად გრძნობს“.

რაც შეეხება კლინიკაში შეყვანილ ხუთ ჯარისკაცს, მათ კორონა ვირუსზე ტესტირებას დღეს ჩაუტარებენ. მათგან ერთს პნევმონია აღენიშნება: „ ტემპერატურა აღარ აქვთ, როცა მოვიდნენ ჰქონდათ 37, ცოტა ყელის ტკივილი. ამ დილით, მათი მდგომარეობა კარგია. მეხუთე ჯარისკაცს, აღმოაჩნდა პნევმონია და სხვა პალატაშია განთავსებული. დღეს მოვა ლუგარის ლაბორატორია და აუცლებლად ავიღებთ ტესტებს“, - უთხრა ლალი ტურძელაძემ ჟურნალისტებს.

მისივე თქმით, ჯარისკაცები მარნეულში პატრულირებდნენ, შემდეგ ნაწილში წავიდნენ და სიმპტომები იქ დაეწყოთ.

ამჟამად საუინვერსიტეტო კლინიკაში 55 პაციენტია, მათგან 12-ს კორონავირუსი დაუდასტურდა.

25 მარტის დილის მონაცემებით ქვეყანაში სულ 77 დადასტურებული შემთხვევაა. განკურნებულია 10 პაციენტი.

[sknews.ge]