ერთი პაციენტის მდგომარეობა განსაკუთრებით მძიმეა - მარინა ეზუგბაია

„ყველაზე მძიმე პაციენტი ასაკოვანი ქალბატონია, რომელზეც მუდამ ვსაუბრობთ, რომ არის რისკის შემცველი პაციენტი თავის ასაკის, თანმხლები დაავადების–ნევროლოგიური და მძიმე დაავადების პარალელურ რეჟიმში, გულ–სისხლძარღვთა სისტემის დაავადების გამო. დღეისათვის შემიძლია გითხრათ, რომ დაავადება პროგრესირებს ორმხრივ პნევმონიასთან ერთად, მასთან უკვე სეფსისის დიაგნოზიც დასტურდება. შესაბამისად, წარმოებს მისი მკურნალობა. შედეგების და პროგნოზის თქმა შეუძლებელია, ვნახოთ, დინამიკაში როგორი სიტუაცია იქნება,“ – უთხრა ჟურნალისტებს თბილისის ინფექციური საავადმყოფოს სამედიცინო დირექტორმა მარინა ეზუგბაიამ.

კლინიკა უკვე დატოვა ათმა განკურნებულმა პაციენტმა. მარინა ეზუგბაიას ინფორმაციით, საავადმყოფოში მყოფი 32 პაციენტიდან 3 ახალი შემთხვევაა და ყველა მათგანის მდგომარეობა სტაბილურია. დღის განმავლობაში კლინიკა კიდევ 10 ტესტის პასუხს ელოდება.

25 მარტის 11:00 საათის მონაცემებით საქართველოში კორონავირუსის 73 შემთხვევაა დადასტურებული. 10 პაციენტი უკვე განკურნებულია. კარანტინის რეჟიმში იმყოფება - 4055, ხოლო სტაციონალური მეთვალყურეობის ქვეშ - 252. ქვეყანაში მოქმედებს საგანგებო მდგომარეობა, მარნეულისა და ბოლნისის მუნიციპალიტეტები ჩაკეტილია და გამოცხადებულია კარანტინის ზონებად.

[ნუკა სტეფნაძე, ახალციხე]