სამთო-სათხილამურო კურორტები დაიხურა

საკოორდინაციო საბჭოს გადაწყვეტილების მიხედვით დღეიდან, 16 მარტიდან სამთო კურორტები დაიკეტა. გუდაურში არსებულ იმ ობიექტებიდან კი, სადაც ტურისტი იმყოფებოდა, იზოლაციაში 30 ადამიანი გაუშვეს, მათგან სამს ვირუსის სიმპტომები აქვს.

„ჩეხი მოქალაქე, რომელიც იმყოფებოდა საქართველოში, რვა მარტს, როგორც თვითონ ყვება დაუდასტურდა კორონა ვირუსი. ის გაემგზავრა ჩეხეთში. მას ჰქონდა კონტაქტი ჩვენს საელჩოსთან, ისევე, როგორც იმ წარმომადგენლებთან სასტუმროების, სადაც ის იმყოფებოდა და დაადასტურა რომ აქვს და დაუდასტურდა კორონა ვირუსი. ეს გახდა გარკვეულწილად იმის ბიძგი, რომ ჩვენ მივიღეთ ეს გადაწყვეტილება და სამთო კურორტებზეც ვაწესებთ შეზღუდვებს“, - განაცხადა ჯანდაცვის მინისტრმა ეკატერინე ტიკარაძემ.

მისივე თქმით, ჩეხ მოქალაქეს კორონავირუსი სამშობლოში დაბრუნების შემდეგ დაუდასტურდა. რის შემდეგაც მან საქართველო დატოვა, არ დამალა დაავადების შესახებ, და სრულად აღწერა მარშრუტი, რომლის მიხედვითაც იგი გადაადგილდებოდა. გარდა ამისა, მან საქართველოს მიაწოდა სასტუმროების, რესტორნებისა და იმ მანქანების ნომრების სია, რომლითაც გადაადგილდებოდა.

„ამ ეტაპზე იზოლირებულია 30 პიროვნება და მიმდინარეობს დამატებითი კონტაქტების შესწავლა, რათა სიმპტომების გამოვლენამდე მოხდეს ამ ადამიანების იზოლაცია“.

მთავრობაში განმარტავენ, რომ საგანგებო სიტუაციის გამოცხადების აუცილებლობა ჯერ არ არის.

„შეწყდება საბაგიროების მუშაობა, მოხდება კონსერვაცია და დასაწყობება იმ ტექნიკისა, რომელიც კურორტს ემსახურებოდა. შესაბამისად, კურორტები წყვეტენ მუშაობას და ეს გამართლებული ნაბიჯია. კვების ობიექტებს მიეცათ რეკომენდაცია, რომ შეწყვიტონ მომსახურება მათ სივრცეებში და გადავიდნენ მიტანის სერვისზე. კვების ობიექტები მეტ-ნაკლებად შემზადებულები არიან ამისთვის“ , - აცხადებს ეკონომიკის მინისტრი ნათია თურნავა.

[sknews.ge]