ახალციხეში კაფეების და რესტორნების ნაწილმა მოქალაქეების მიღება შეაჩერა

ახალციხეში კვების ობიექტების ნაწილმა მოქალაქეების მიღება უკვე შეაჩერა, ნაწილს კი მხოლოდ ე.წ გატანის სერვისი აქვს.

"შექმნილი სიტუაციის გამო ნამცხვრის სახლი იმუშავებს მხოლოდ გაყიდვებზე! ადგილზე დასხდომით არ მოემსახურება არცერთ სტუმარს! გარდა ამისა შეგიძლიათ ისარგებლოთ გამოძახების და ადგილზე მიტანის სერვისით", – წერია "ნამცხვრის სახლის" მიერ გავრცელებულ განცხადებაში.

მოქალაქეების მიღება ასევე შეაჩერეს შემდეგმა რესტორნებმა "დუბლმა" და "რაბათმა".

დღეს, 16 მარტს მთავრობამ კორონავირუსის გავრცელების საპრევენციო ღონისძიებების ფარგლებში ახალი გადაწყვეტილებები მიიღო.

▶ 18 მარტიდან, ორი კვირით იკრძალება საქართველოს სახელმწიფო საზღვარზე შემოსვლა უცხო ქვეყნის მოქალაქეებისთვის;

▶დროებით იკეტება საქართველოს სამთო-სათხილამურო კურორტები;

▶კაფეებს, რესტორნებსა და ბარებს ეძლევათ რეკომენდაცია, დროებით შეიზღუდოს მოქალაქეების უშუალო მომსახურება და იმოქმედოს მხოლოდ ე.წ გატანის სერვისებმა;

▶მთავრობის ადმინისტრაციაში იქმნება უწყებათაშორისი საკოორდინაციო საბჭოს სხდომაზე მიღებული გადაწყვეტილებების შესრულების მონიტორინგის მექანიზმი;

▶70 წელს გადაცილებულ მოქალაქეებს ეძლევათ რეკომენდაცია, მაქსიმალურად მოერიდონ საზოგადოებრივი თავშეყრის ადგილებს და შეძლებისდაგვარად იმყოფებოდნენ იზოლაციაში, რათა თავიდან იყოს აცილებული პოტენციური საფრთხე მათი ჯანმრთელობისთვის;

ცნობისთვის, საქართველოში კორონავირუსის 33 შემთხვევაა დაფიქსირებული. თბილისის ინფექციური საავადმყოფოს დირექტორის, მარინა ეზუგბაიას განცხადებით, პირველი პაციენტი, 50 წლამდე კაცი, უკვე განიკურნა, იგი სამედიცინო დაწესებულებას სავარაუდოდ დღეს დატოვებს.

[sknews.ge]