დანით დაჭრილი ბიჭებიდან კლინიკაში ერთი მათგანი რჩება

„რეანიმაციიდან პალატაში გადაიყვანეს. ჯერ პოლიცია არ მოსულა, ჩემი ძმა ჯერ კიდევ ნარკოზის ქვშ იმყოფება, ნორმალურად ვერ ლაპარაკობს“, – ამბობს მარტინ ქევნაქსზიანის ძმა.

ახალქალაქში, ექვს თებერვალს ქორწილში მომხდარი ჩხუბის შედეგად კლინიკაში ექვსი დაშავებული შეიყვანეს, აქედან ოთხს ჭრილობები ცივი იარაღით ჰქონდა მიყენებული.

როგორც ახალქალაქის სამედიცინო დაწესებულებაში განგვიმარტეს, მდგომარეობის სიმძიმიდან გამომდინარე, სამედიცინო ჩარევა სამ მათგანს დაჭირდა. იმავე დღეს ორი დაჭრილი თბილისში გადაიყვანეს, ერთი კი ახალქალაქის კლინიკაში დატოვეს.

მომხდარის შემდეგ სამართალდამცავებმა ოთხი ახალგაზრდის განზრახ მკვლელობის მცდელობის ბრალდებით, ორი პირი დააკავეს.

გამოძიება საქართველოს სსკ-ის 19-109-ე მუხლის მე-3 ნაწილის "ა" ქვეპუნქტით მიმდინარეობს, რაც ორი ან მეტი პირის მიმართ დამამძიმებელ გარემოებაში ჩადენილ განზრახ მკვლელობის მცდელობას გულისხმობს.

დაკავებულებს აღკვეთის ღონისძიებად პატიმრობა ცხრა თებერვალს შეეფარდათ.

[თინათინ ზაზაძე, ახალქალაქი]