ქორწილში მამაკაცების დაჭრაში ბრალდებულებს წინასწარი პატიმრობა შეეფარდათ

ორი პირის აღკვეთის ღონისძიებაზე ახალციხის რაიონულმა სასამართლომ დღეს, ცხრა თებერვალს იმსჯელა. 28 წლის მამაკაცები პატიმრობაში რჩებიან.

ახალქალაქში დაპირისპირება ექვს თებერვალს მოხდა. ჩხუბში, ცივი იარაღით სამი ახალგაზრდა დაიჭრა. დაშავებულები 29, 27 და 23 წლის მამაკაცები არიან.

სამცხე-ჯავახეთის პოლიციის დეპარტამენტის დეტექტივებისა და ახალქალაქის რაიონული სამმართველოების თანამშრომლებმა, ორი პირი - 1991 წელს დაბადებული ს.ს. და 1991 წელს დაბადებული ს.ს., ორი ან მეტი პირის მიმართ დამამძიმებელ გარემოებაში ჩადენილი განზრახ მკვლელობის მცდელობის ბრალდებით დააკავეს.

გამოძიებით დადგინდა, რომ ბრალდებულებმა ახალქალაქში, პირადი კონფლიქტის ნიადაგზე, ცივი იარაღის გამოყენებით სხეულის მრავლობითი დაზიანება მიაყენეს 1990 წელს დაბადებულ ა.ა.-ს, 1996 წელს დაბადებულ მ.ქ.-ს, 1998 წელს დაბადებულ ს.ა.-ს და 1992 წელს დაბადებულ რუსეთის ფედერაციის მოქალაქეს - ა.ა.-ს.

გამოძიება საქართველოს სსკ-ის 19-109-ე მუხლის მე-3 ნაწილის "ა" ქვეპუნქტით მიმდინარეობს, რაც ორი ან მეტი პირის მიმართ დამამძიმებელ გარემოებაში ჩადენილ განზრახ მკვლელობის მცდელობას გულისხმობს.

[თაკო ფეიქრიშვილი, ახალციხე]