'გადაწყვეტილება მიღებული მაქვს რომელ პარტიაში გავერთიანდები' – ვანო მერაბიშვილი

„მე ვარ ვანო მერაბიშვილი ყოფილი პრემიერ–მინისტრი, ამავე დროს აქტიური ადამიანი, რომელიც აქტიურად ჩავერთვები პოლიტიკაში. აქტიურად ვმუშაობ არასაჯაროდ, მხედველობაში მაქვს მობილური ტელეფონის გამოყენებით, ვესაუბრები ადამიანებს, მეგობრებს, კოლეგებს თანამებრძოლებს, ყველა პარტიიდან, ვგულისხმობ ოპოზიციაში მყოფი პარტიების დიდ ნაწილს“,– განაცხადა „მთავარ არხთან“ ვანო მერაბიშვილმა.

იგი ამბობს, რომ გადაწყვეტილება, თუ რომელ პარტიასთან ითანამშრომლებს, მიღებული აქვს.

„ჩემი ამოცანა არის ის, რომ ქართველ ხალხთან გაერთიანდეს ოპოზიცია და ქართველ ხალხთან ერთად შეცვალოს ეს ხელისუფლება. რა თქმა უნდა მე ერთ – ერთ პარტიაში გავერთიანდები. გადაწყვეტილება უკვე მიღებული მაქვს. თუ რომელში ამის შესახებ ახლა ვერ ვიტყვი, მაგრამ ყველამ იცის ამის შესახებ“,– დასძინა მან.

მერაბიშვილმა ასევე აღნიშნა, რომ ის პოლიტიკაში ჩაერთვება იმ ფორმით, რომ არავინ დააზიანოს.

„შეუძლებელია ყოფილი პრემიერ–მინისტრი გახდეს მინისტრი, მე მიმაჩნია, რომ ერთი და იგივე ადამიანები არ უნდა მოდიოდნენ ხელისუფლებაში, მაშინ, როცა ძალიან ბევრი ახალგაზრდა ადამიანები გვყავს და ახალგაზრდება უნდა აკეთონ საქმე. მე მაქვს პოლიტიკური ამბიცია, რომ შეიცვალოს ეს ხელისუფლება და ამისთვის ყველაფერს გავაკეთებ, რომ მოვიდეს ნორმალური ხალხი ხელისუფლებაში და ჩემი პოლიტიკაში მონაწილეობა იქნება მინიმალური. ხელისუფლების შეცვლამდე ვაპირებ პოლიტიკურ მოღვაწეობას, მერე მმართველობით სისტემაში მონაწილეობას არ მივიღებ", – განმარტა მერაბიშვილმა.

წამყვანის კითხვაზე – რა უნდა მოხდეს, რომ ბიძინა ივანიშვილთან დაჯდეს სალაპარაკოდ – მერაბიშვილმა უპასუხა, რომ იგი "ოცნების წარმომადგენლებთან დაჯდომას არ აპირებს".

[ნუკა სტეფნაძე]