‘ორნამენტები ქართულ მეჩეთებში’ - 25 თებერვალს კატალოგის პრეზენტაცია გაიმართება

„ორნამენტები ქართულ მეჩეთებში“ კატალოგის წარდგენა 25 თებერვალს, 11:00 საათზე, თბილისში, საქართველოს პარლამენტის ეროვნულ ბიბლიოთეკაში გაიმართება. ისტორიულ სალოცავებში არსებული ორნამენტების, მათი გამომსახველობის თავისებურებებისა და მნიშვნელობის შესახებ, თავად კატალოგის ავტორები ისაუბრებენ.

მასალაში თავმოყრილია ის ესკიზები და ორნამენტები, რომლებიც სამცხე-ჯავახეთსა და აჭარის რეგიონებში არსებული მეჩეთების კედლებზე გვხვდება. მათ შორის, სამცხე-ჯავახეთიდან ყველა მეჩეთია შესული, ახალციხისა და ახალქალაქის ციხხეებში არსებული მეჩეთების გარდა, იმ მიზეზით, რომ მათში რაიმე სახის ორნამენტი არ ფიქსირდება.

ესკიზების შექმნა ისლამური კუტურის მკვლევარმა, ნესტან ბლუაშვილმა 2015 წელს დაიწყო: „ერთ დღეს უბრალოდ ჩემთვის ვცადე გადმოხაზვა და კარგად გამომივიდა. მერე ყოველდღე ერთ ესკიზს ვქმნიდი. ეს უზომოდ დიდ სიხარულს მანიჭებდა. ორნამენტები ხელით არის სათითაოდ ხეზე გამოკვეთილი და თითოეულ ხაზს ეტყობა. ოსტატი ძალიან დიდი სისათუთით და სიყვარულით აკეთებდა თავის საქმეს და ეს ემოციები ჩემზეც გადმოდიოდა”, - ამბობს ბლუაშვილი.

კატალოგი თურქეთის საელჩოსა და თურქეთის თანამშრომლობისა და კოორდინაციის სააგენტოს მხარდაჭერით გამოიცა.

მესხეთში უფუნქციოდ დარჩენილი ორმოცამდე მეჩეთია, მათგან 27-ს კულტურული მემკვიდრეობის ძეგლის სტატუსი აქვს მინიჭებული.

[თაკო ფეიქრიშვილი, ახალციხე]