‘სოლიდარობა აჭარის ტელევიზიას’ - ჟურნალისტების აქცია ახალციხეში [ვიდეო]

ჟურნალისტები დღეს, 17 თებერვალს ახალციხეში, რუსთაველის ძეგლის მიმდებარე ტერიტორიაზე შეიკრიბნენ, მედიას არასამთავრობო ორგანიზაციის წარმომადგენლებიც შეუერთდნენ.

აქციის მონაწილეებმა გააპროტესტეს აჭარის ტელევიზიაში მიმდინარე მოვლენები.

„სოლიდარობა, აჭარის საზოგადოებრივ მაუწყებლობას და რადიოს, სახელწოდებიდან გამომდინარე ეს არის საზოგადოების არხი და ბუნებრივია საზოგადობრივ ტკივილებსა და დაკვეთეზე უნდა მუშაობდეს. ამიტომ თოთოეული მოქალაქის ვალია დაუდგეს სიტყვის თავისუფლებას გვერდით“, – განაცხადა „სამხრეთის კარიბჭეს" ჟურნალისტმა გულო კოხოძემ.

„აქ ჯერ კიდევ ხელისუფლება, ვერ აკონტროლებს თუ რა უნდა გავიდეს ეთერში, ამიტომ ის ცდილობს სამსახურიდან გაუშვას ის ადამიანები, რომლებზეც დგას სიტყვის თავისუფლება“, – განაცხადა „საერთაშორისო გამჭვირვალობა საქართველოს“ რეგიონულმა კოორდინატორმა სამცხე–ჯავახეთში თამუნა უჩიძემ.

„დღეს თავისუფალი მედია აპროტესტებს ხელისუფლების მცდელობას, რომ ჩაერიოს აჭარის მაუწყებლის მუშაობაში და ამით მოხდეს კიდევ ერთი მედიის გაკონტროლება, სწორედ ამიტომ შევიკრიბეთ ახალციხეში“, – განაცხადა ტელეკონპანია „მეცხრე არხის“ დირექტორმა მაია იველაშვილმა.



"საზოგადოებრივი მაუწყებლის ახალმა დირექტორმა, არაერთხელ გამოხატა უკმაყოფილება იმ ჟურნალისტების მიმართ, რომლებიც ტელევიზიაში კრიტიკულ კონტენტს ქმნიან. ბოლო დღეებში გაჟღერდა ინფორმაცია, რომ გიორგი კოხრეიძე აპირებს საინფორმაციო სამსახურის უფროსის და მისი მოადგილის პოსტიდან ჩამოცილებას, ახალმა დირექტორმა უარი თქვა ეთერში საგამოძიებო ფილმების განთავსებაზე. ასევე აიძულა ტელევიზია დაეტოვებინა ნათია ზოიძეს, რომელიც არხის სარედაქციო პოლიტიკას განსაზღვრავდა", – ნათქვამია ჟურნალისტური ეთიკის ქარტიის განცხადებაში.


[sknews.ge]