ახალციხეში სომხურმა სამოციქულო ეკლესიამ კულტურულ- საგანმანათლებლო ცენტრი გახსნა

ცენტრი, ახალციხეში, სომხური სამოციქულო ეკლესიის გვერდით მდებარე შენობაში ფუნქციონირებს. აქ ახალგაზრდებს მხატვრობას, სომხურ ცეკვას, სიმღერასა და ამავე ქვეყნის კულტურას უფასოდ შეასწავლიან.

„ცენტრი არ არის მხოლოდ ეთნიკური სომხებისთვის, აქ სიარული ნებისმიერ მსურველს შეუძლია. ის მართალია ახალგაზრდებისთვისაა გათვლილი, თუმცა ასაკი მკაცრად განსაზღვრული არაა“, – ამბობს ახალციხის მუნიციპალიტეტის საკრებულოს დეპუტატი ამბარცუმ ბაბოიანი.

ცენტრის გახსნის ცერემინია 17:00 საათზე ახალციხის სომხური სამოციქულო ეკლესიების წინამძღვარმა აკოფ სააკიანმა ლოცვით დაიწყო. შესრულდა სომხური ცეკვები და სიმღერებიც. ღონისძიებას საქართველოში სომხური სამოციქულო ეკლესიის ეპისკოპოსი ვაზგენ მირზახანიანი, ახალციხე–ადიგენის მაჟორიტარი დეპუტატი, ახალციხის ადგილობრივი თვითმმართველობის წარმომადგენლები და სომხური სამოციქულო ეკლესიის მრევლი ესწრებოდა.

„მიხარია რომ ასეთი ცენტრი გაიხსნა ჩვენთან, ჩემ შვილს დიდი სიამოვნებით მოვიყვან აქ რომ ახალი საგნები და სომხეთის კულტურა კარგად შეისწავლოს“, – ამბობს ახალციხელი რიპსიმე შუშანიანი.

ცენტრში აცხადებენ, რომ სამომავლოდ ქართულ ენასისა და ისტორიის საგნების დამატებასაც გეგმავენ.






[მარიამ ბარძიმაძე, ახალციხე]