სომხური სამოციქულო ეკლესია „ვარდავარს“ ზეიმობს

დღესასწაულის აღნიშნვნა დილის 10:00 საათზე, ახალციხის სოფელ წყრუთთან მდებარე ეკლესიაში წირვით დაიწყო. ღვთისმსახურების დასრულების შემდეგ, მრევლმა ეკლესიის ეზოში ტრადიციული წუწაობის რიტუალი შეასრულა.

სომხურ ტრადიციულ დღესასწაულთა შორის "ვარდავარი" ერთ – ერთი ყველაზე საყვარელი სომხური ტრადიციული დღესასწაულია, რომელსაც ათასწლეულების ისტორია აქვს. ამ დღეს ადამიანების ჯგუფები ეზოებში, ქალაქის მოედნებზე, მინდვრებზე იკრიბება და ერთმანეთს წყალს ასხამს.

წარმართულ სომხეთში, იგი უკავშირდებოდა სიყვარულისა და სილამაზის ქალღმერთ ასტღიკისა და ანაჰიტის თაყვანისცემას. ქრისტიანობის მიღების შემდგომ კი დღესასწაულმა სახე იცვალა, მაგრამ შეინარჩუნა თავისი არსი.

,,ვარდავარი'' ქრისტიანული დღესასწაულია და ქრისტეს ფერისცვალებას უკავშირდება. სახარების მიხედვით, იესო ქრისტე მოციქულებთან ერთად ავიდა თაბორის მთაზე ლოცვისთვის, სიცხისა და დაღლილობისგან მოციქულები იძინებენ, ამ დროს მლოცველ ქრისტე ნათელით შეიმოსა, სახე მზესავით გაანათდა და ტანსაცმელი თოვლივით გათეთრდა. სახარებაში ნათქვამია, რომ ქრისტეს სამოსი გასხივოსნებული იყო. სწორედ ეს დღესასწაული დაედო საფუძვლად ერთმანეთისთვის წყლის შესხმას, წუწაობის ძველ ტრადიციას. წყლის შესხმის დროს მორწმუნეები ერთმანეთს ჯანმრთელობასა და წარმატებას უსურვებენ. მათი რწმენით, წყალი განასახიერებს საღმრთო მადლს.

"ვარდავარი" მოძრავი დღესასწაულია, რომელსაც სომხური სამოციქულო ეკლესია აღდგომიდან 98–ე დღეს, 28 ივნისიდან 1 აგვისტოს მონაკვეთში, კვირა დღეს აღნიშნავს.





[რიმა სარუხანიან]