სამინისტრო კორონავირუსზე: 'დაავადების შემოტანის შემთხვევაში ჯანდაცვის სისტემა მზადყოფნაშია'

„უკანასკნელ საათებში სოციალური ქსელებით ვრცელდება სრულიად დაუსაბუთებელი, უპასუხისმგებლო და დანაშაულებრივი ხმოვანი გზავნილი.

დაავადებათა კონტროლისა და საზოგადოებრივი ჯანმრთელობის ეროვნული ცენტრი უფლებამოსილია განაცხადოს:

ამ ეტაპისთვის საქართველოში ახალი კორონავირუსული ინფექციის არც ერთი შემთხვევა არ დაფიქსირებულა და ვთხოვთ მოსახლეობას ნუ აყვება პანიკას!

აღნიშნული ხმოვანი გზავნილი დეზინფორმაციაა, ემსახურება არაკეთილსინდისიერი ადამიანების კერძო, მერკანტილურ ინტერესებს და დანაშაულია ხალხის წინაშე!“, – წერია სამინისტროს მიერ გავრცელებულ განცხადებაში.

უწყების განმარტებით, საქართველოს სახელმწიფო ყველაფერს აკეთებს, რათა მოხდეს ქვეყნის ტერიტორიაზე ახალი კორონავირუსის შემოტანისა და გავრცელების პრევენცია. ქვეყნის ჯანდაცვის სისტემა სრულ მზადყოფნაშია და შეუძლია დაავადების შემოტანის შემთხვევაში უზრუნველყოს გადაუდებელი სამედიცინო დახმარება თანამედროვე საერთაშორისო სტანდარტების შესაბამისად.


სამინისტრო მოწოდებს მოსახლეობას არ აყვეს პანიკას: „გაეცანით სანდო საიფორმაციო წყაროებს და ენდეთ პროფესიონალების რეკომენდაციებს!“

ჯანდაცვის მინისტრის ეკატერინე ტიკარაძეის განცხადებით, მიღწეულია გარკვეული შეთანხმება ქვეყნებთან, რომელთა დახმარებითაც საქართველოს მოქალაქეები ჩინეთს დატოვებენ.

„ჩვენ ვართ სრულიად მობილიზებული და მზად ვართ მივიღოთ ჩვენი მოქალაქეები, რომლებიც ამ წუთისათვის არიან ჩინეთში და ფაქტის დაფიქსირების შემთხვევაში ვმართოთ ვირუსი. თურქეთის რესპუბლიკიდან სულ ახლახან მივიღეთ ინფორმაცია, რომ მათი თვითმფრინავი ჩინეთის მიმართულებით აფრინდა, რითიც შეგვიძლია დავადასტუროთ ის, რომ ჩვენი მოქალაქეები, რომლებიც ჩინეთში იმყოფებიან და განაცხადეს თანხმობა ევაკუაციის შესახებ, გადმოფრინდებიან თურქეთში და იქ გაივლიან კარანტინის პერიოდს. ევაკუაციაზე თანხმობა განაცხადა საქართველოს ოთხმა მოქალაქემ, თუმცა დაგვიკავშირდა რამდენიმე ქართველი ტურისტიც, რომელიც ჩინეთში იმყოფება და მათთან მიმდინარეობს მოლაპარაკება,“ - აღნიშნა ეკატერინე ტიკარაძემ ჯანდაცვის სამინისტროში, საკოორდინაციო საბჭოს სხდომაზე.

თიკარაძის თქმით, თერმული სკრინინგის გარდა, თბილისის აეროპორტში, მგზავრები თბოკამერითაც მოწმდებიან.

საგანგებო სიტუაციების კოორდინაციისა და გადაუდებელი დახმარების ცენტრის დირექტორი მოსახლეობას აფრთხილებს, რომ თუ გადაუდებელი აუცილებლობა არაა ნუ განახორციელებენ ვიზიტს ჩინეთში.

ავთანდილ თალაკვაძე ნებისმიერ ვირუსთან დაკავშირებით, საზოგადოებას ზოგად რეკომენდაციებსაც აძლევს. მისი თქმით, ვირუსის თავიდან აცილების მიზნით მნიშვნელოვანია სივრცის ხშირი განიავება, ხელების სადეზინფექციო საშუალებებით დაბანა და იმ შემთხვევაში თუ ვირუსი გიფიქსირდებათ პირბადის ტარება სხვასთან კომუნიკაციის დროს.

ჩინეთის დაავადებათა კონტროლის ცენტრის მიერ, 13 იანვარს გავრცელებული ინფორმაციის მიხედვით, კორონავირუსის 9 692 შემთხვევაა დაფიქსირებული, მათ შორის 90 ჩინეთს გარეთ, 19 ქვეყანაში. ამ დაავადებით უკვე გარდაცვლილია 213 ადამიანი.

[sknews.ge]