ახალციხეში ომში დაღუპულთა მემორიალს დადგამენ

მემორიალის ადგილი შერჩეულია. ახალციხის მუნიციპალიტეტის კულტურის სამსახურში განმარტავენ, რომ მემორიალი ქალაქის ცენტრალურ პარკში დადგმება.

რისგან დამზადდება მემორიალი და როგორი ფორმა ექნება, ეს საზოგადოების მსჯელობის საგანია. გუშინ უკვე გაიმართა შეხვედრა ადგილობრივ ხელისუფლებაში, რომელსაც მუნიციპალიტეტის ხელმძღვანელები და მოქალაქეები ესწრებოდნენ.

გუშინვე შეიქმნა სამუშაო ჯგუფიც, რომელსაც ომის ვეტერანი გია კოპაძე ხელმძღვანელებს. სამუშაო ჯგუფმა მემორიალის დადგმასთან დაკავშრებულ საკითხებზე ათი დღის განმავლობაში უნდა იმუშაოს.

მემორიალი საზოგადების შემოწურულობებითა და ადგიილობრივი ბიუჯეტის სახსრებით დაიდგმება. პირველ ეტაპზე ადგილობრივი ბიუჯეტიდან 15 000 ლარია გამოყოფილი. მუნიციპალიტეტის საკრებულოში განმარტავენ, რომ აღნიშნული თანხა საწყისია და შესაძლოა კიდევ დაემატოს.

გია კოპაძე ამბობს, რომ საზოგადოების მხრიდან მონაწილეობის მსურველი ბევრია.

„ბევრ ადამიანს აქვს სურვილი თანხის გაღების, ბიზნესმენებს, ჩვენს თანამებრძოლებს. დავდებთ სპეციალურ ყულაბებს მაღაზიებსა და სუპერმარკეტებში, სადაც შეწირულობებს ჩაყრიან. ჩვენი მეგობრები დაგვეხმარებიან მემორიალის დადგმის დროს ტექნიკით, მუშახელით და სამშენებლო მასალებით“,-ამბობს გია კოპაძე და ამატებს, რომ დაგეგმილია საბანკო ანგარიშის გახსნაც.

როდის დაიწყება მემორიალის დამზადება და ვინ შეასრულებს სამუშაოებს, ამ ეტაპზე უცნობია.

შეგახსენებთ, რომ სამამულო ომში დაღუპულთა მემორიალი ახალციხეში არსებობს, თუმცა, მასზე არაა ბოლო წლებში დაღუპულ ადამიანთა სახელები.

აღსანიშნავია, რომ საქართველოს ტერიტორიული მთლიანობისთვის ბრძლაში რეგიონიდან დაღუპულთა მემორიალი წელს თავდაცვის სამინისტროს წვრთნებისა და სამხედრო განათლების სარდლობის ახალციხის ჯავაშასატანკო სასწავლო ცენტრში [ახალციხის სატანკო ნაწილი] ჯარისკაცებმა გააკეთეს. თუმცა, ამ ნაწილში მოქალაქეების შესვლა დაუშვებელია.


ეს არის მემორიალი სატანკო ნაწილში. სპეციალური განათების წყალობით, ღამით დაფა ნათდება და მასზე არსებული ყველა სახელი და გვარი ღამეც გარკვევით იკითხება

[თინათინ ზაზაძე, ახალციხე]