სოხუმის დაცემის 26 წლისთავთან დაკავშირებით, ახალციხეში მემორიალი ყვავილებით შეამკეს

1992–93 წლებში, აფზახეთის ომში, სამცხე–ჯავახეთიდან 700 მებრძოლი წავიდა. აქედან 37 დაიღუპა.

საქართველოს ტერიტორიული მთლიანობისთვის დაღუპულთა მემორიალთან დღეს ომის მონაწილე გიორგი ლომიძეც მივიდა. იგი „თეთრი არწივის“ ბატალიონში იბრძოდა და სოხუმი დაცემემადე ორი დღით ადრე დატოვა, რათა დაღუპული დეიდაშვილის შვილი გადმოესვენებინა.

„ვიყავი „თეთრ არწივში“. ჩვენი მეთაური იყო გია ყარყარაშვილი. მე ახალციხის ბატალიონის უფროსი ვიყავი. თავიდანვე მონაწილე ვარ ამ უბედურების. პაატა ნათენაძე ჩემზე წინ გაუშვეს (მაშინ მილიცია იყო). გაუშვეს „ჟიგულებითა“ და სხვა მსუბუქი მანქანებით, არც გააფრთხილეს, რომ ომი იყო და სამი მებრძოლი მილიციელი დაიღუპა. მერე ჩვენ შევედით. ვაკეთებდით იმას, რასაც მეთაურები გვავალებდნენ. გული გვტკივა, ამხელა ომის მერე რომ მიწა–წყალი დავკარგეთ“, – გვითხრა ლომიძემ.

ღონისძიებას ახალციხე–ადიგენის მაჟორიტარი დეპუტატი გია კოპაძეც ესწრებოოდა. მისი თქმით, წელს ომში დაღუპულთა მემორიალი აუცილებლად უნდა განახლდეს.

„ჩვენი წარსული და ჩვენი ფიქრი არის ეს ძეგლი, ერთი ბეწო, რომელიც ცოტა სხვანაირი უნდა იყოს. ჩემს თავსაც ვადანაშაულებ ამაში და – ყველა იმ ადამიანს, ვისაც ეს ეხება. წელს აუცილებლად უნდ გაკეთდეს მემორიალი, რაც მრავალჯერ, სხვადასხვა მიზეზების გამო, გადაიდო“, – ამბობს კოპაძე.

აფხაზეთში სამხედრო დაპირისპირება 13 თვე და 13 დღე გაგრძელდა.

1993 წლის 27 სექტემბერს კი სოხუმის დაცემით და საქართველოს შეიარაღებული ძალების მარცხით დასრულდა.



[მარიამ ბარძიმაძე, ახალციხე]