სახალხო დამცველი: მინდა დავგმო ოხანაშვილსა და მის შვილებზე ვერბალური თავდასხმა

სახალხო დამცველი, ნინო ლომჯარია ფეისბუქით ბაკურიანში მომხდარ ინციდენტს ეხმაურება.

„მსგავსი შემთხვევების შეფასების დროს, როდესაც საქმე საჯარო პირების ოჯახის წევრებს, მითუმეტეს მცირეწლოვნებს ეხება და მისასალმებელია, რომ პოლიტიკურმა ოპონენტებმაც მსგავსი პოზიცია დააფიქსირეს. პოლიტიკური პოლარიზების მიუხედავად, ჩვენ უნდა დავრჩეთ ადამიანებად და საზოგადოებად“,- აცხადებს სახალხო დამცველი.

ინციდენტი გუშინ, 14 იანვარს ბაკურიანში ერთ-ერთ რესტორანში მაშინ მოხდა, როდესაც დეპუტატი, პარლამენტის იურიდიულ საკითხთა კომიტეტის თავმჯდომარე ანრი ოხანაშვილი, ოჯახთან ერთად ვახშმობდა. შემთხვევის შედეგად შსს–მ საზოგადოებრივი მოძრაობა „ლელოს“ აქტივისტი, ვახტანგ რობაქიძე დააკავა.

დღეს, 15 იანვარს ახალციხის რაიონულმა სასამართლომ რობაქიძეს სამდღიანი პატიმრობა შეუფარდა.

„ოხანაშვილს ვუთხარი რომ ქვეყნის გამყიდველი და მოღალატეა და ამის გამო მოხდა ეს. კაფეში ბავშვებთან ერთად შესვლის დროს მივესალმე და შემდეგ გამოველაპარაკე. ამის მერე წავედი, დავჯექი ჩემს მაგიდასთან, არანაირი ხელით შეხება არ ყოფილა, უბრალოდ სიტყვიერი შელაპარაკება მოგვივიდა ერთმანეთში", - განაცხადა რობაქიძემ.

პროცესზე ოხანაშვილს ადვოკტი არ ჰყოლია. მას ბრალი ადმინისტრაციული სამართალდარღვევათა კოდექსის 173 მუხლით ედება, რაც სამსახურებრივი მოვალეობის შესრულების დროს სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა ან/და მის მიმართ შეურაცხმყოფელი ქმედების განხორციელებას გულისხმობს.

საქმეზე ასევე, გამოძიება სსკ-ს 151–ე მუხლით მიმდინარეობს, რაც მუქარას გულისხმობს.

[sknews.ge]