‘ოხანაშვილს ვუთხარი, რომ ქვეყნის მოღალატეა’ - რობაქიძე 'ოცნების' დეპუტატთან მომხდარ ინციდენტზე

რობაქიძემ დაგვიდასტურა, რომ ის საზოგადოებრივი მოძრაობა „ლელოს“ წევრია.

„ოხანაშვილს ვუთხარი რომ ქვეყნის გამყიდველი და მოღალატეა და ამის გამო მოხდა ეს. ვიცნობ დიდი ხანია ამ პიროვნებას და არ ვიცი, თვითონ რატომ თქვა, რომ არ მიცნობს. კაფეში ბავშვებთან ერთად შესვლის დროს მივესალმე და შემდეგ გამოველაპარაკე. ამის მერე წავედი, დავჯექი ჩემს მაგიდასთან, არანაირი ხელით შეხება არ ყოფილა, უბრალოდ სიტყვიერი შელაპარაკება მოგვივიდა ერთმანეთში. ეს ადამიანი ადგა და წავიდა. მერე მოვიდა პოლიცია. იმის მხრიდანაც იყო ჩემს მიმართ ხმამაღალი საუბარი. პოლიციას ვთხოვე, არაფერი მომხდარა და არ გადამიყვანოთ-თქო, ბოდიშს მოვუხდი ამისთვის. ამ პიროვნების მიმართ პროტესტი ჩემმა ნასვამობამ გამოიწვია“, - ამბობს რობაქიძე.

ახალციხის რაიონულ სასამართლოში რობაქიძის პროცესი დღეს, 15 იანვარს გაიმართა, მარიკა ჩიტაშვილმა მას სამდღიანი პატიმრობა შეუფარდა. მას ახალციხეში, დროებითი მოთავსების იზოლატორში გადაიყვანენ.

„173-ე მუხლით გათვალისწინებული სამართალდარღვევის ჩადენასთან დაკავშირებით, ადმინისტრაციული სამართალდარღვევისთვის განესაზღვროს ადმინისტრაციული პატიმრობა სამი დღე-ღამის ვადით. პატიმრობის ვადა აეთვალოს ფაქტობრივი დაკავების მომენტიდან 2020 წლის 14 იანვრის 19:47 წუთიდან და პატიმრობაში ჩაეთვალოს დაკავებაში ყოფნის დრო“ –განაცხადა პროცესზე მოსამართლემ.

პროცესზე ოხანაშვილს ადვოკტი არ ჰყოლია. მას ბრალი ადმინისტრაციული სამართალდარღვევათა კოდექსის 173 მუხლით ედება, რაც სამსახურებრივი მოვალეობის შესრულების დროს სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა ან/და მის მიმართ შეურაცხმყოფელი ქმედების განხორციელებას გულისხმობს.

საქმეზე ასევე, გამოძიება სსკ-ს 151 მუხლით მიმდინარეობს.



[მარიამ ბარძიმაძე, ახალციხე]