ბაკურიანში საბაგიროზე ჟეტონის ნაცვლად საბჭოთა პერიოდის რუბლს იყენებენ

ფოტო – ანა მარშანია

„ოცდახუთიანების“ საბაგიროზე საბჭოთა კავშირისდროინდელი რუბლის გამოყენება სოციალურ ქსელში ბაკურიანის დამსვენებლებმა გააპროტსტეს.

„ბაკურიანში საბაგიროს ბილეთი, თუ წლების განმავლობაში რაღაც ფურცლის ნაგლეჯი იყო, ახლა მიმოქცევაში არც მეტი, არც ნაკლები რუბლი ჩაეშვა. გადაიხდი ლარს და იყიდი რუბლს თავისი ნამგალითა და უროთო, ზვიოზაჩკითა და საიუზ სავეცკიხ სოციალისწიჩესკიხ რესბუბლიკით. ... თუ ვინმემ კარგად ვერ გაიგო ვაზუსტებ, ლარით ყიდულობ მგზავრობას და ბილეთის, ჟეტონის მაგივრად გაძლევენ რუბლს. უწყვიათ კოხტად, მრავლად“, – წერს ანა მარშანია.

დამსვენებლები ამბობენ, რომ ჟეტონების ნაცვლად რუსული რუბლის გამოყენება საბაგიროს ადმინისტრაციას წელს არ დაუწყია: „შარშანაც ასე იყო“.

მთის კურორტების განვითარებს კომპანიაში განმარტავენ, რომ "ოცდახუთიანების" საბაგირო მათ დაქვემდებარებაში არ შედის და ისინი ბაკურიანში კოხტას, მიტარბსა და დიდველს ფლობენ: „ჩვენს მიერ კონტროლირებად საბაგიროებზე მსგავსი ფაქტი არ ფიქსირდება. „დიდველის“, „მიტარბისა“ და „კოხტას“ საბაგიროებზე მოწყობილია ავსტრიული კომპანიის უკონტაქტო გამშვები პუნქტები“, - განაცხადეს საინფორმაციო სააგენტო „ინტერპრესნიუსთან“ ეკონომიკის სამინისტროში.

"ოცდახუთიანების" ტერიტორაზე რამდენიმე საბაგიროა. ერთია ჩემი, მაგრამ ჩვენ ბილეთებს ვყიდით, ჟეტონები არ გვაქვს", – ამბობს ერთ–ერთი საბაგიროს მფლობელი ზურა კურტანიძე.

„სამხრეთის კარიბჭეს“ ინფორმაციით, "ოცდახუთიანებში" საბაგირო, სადაც ჟეტონების ნაცვლად რუსული რუბლი იყიდება, კერძო პირების საკუთრებაა. ადგილობრივების თქმით, იგი ძმებს, გოგოლაძეებს ეკუთვნით.

რედაქცია გოგოლაძეებთან დაკავშირებას რამდენჯერმე შეეცადა, თუმცა ისინი სატელეფონო ზარებს არ პასუხობენ.

იმის შესახებ, რომ საბჭოთა სიმბოლიკის გამოყენება აკრძალულია, „სამხრეთის კარიბჭემ“ არაერთი მასალა მოამზადა.

"ინფორმაციის თავისუფლების განვითარების ინსტიტუტის" (IDFI) დირექტორი, გიორგი კლდიაშვილი, რომელიც წლებია, საბჭოთა ისტორიას იკვლევს, განმარტავს, რომ 2011 წლის კანონი „თავისუფლების ქარტია“ საჯარო სივრცეში კრძალავს საბჭოთა ტოტალიტარულ და ფაშისტურ სიმბოლიკას, საკულტო ნაგებობებს, ძეგლებს, მონუმენტებს, ბარელიეფებს, წარწერებს, ასევე, ქუჩების, მოედნების, სოფლებისა და დაბების სახელწოდებებს.

„პრობლემა ის არის, რომ ხელისუფლებაში მყოფი პირები ვერ აცნობიერებენ საბჭოური ლიდერების ძეგლების მოხსნის მნიშვნელობას. საბჭოური სიმბოლიკის შემთხვევაში სახელმწიფო უსაფრთხოების სამსახური ვალდებულია გააფრთხილოს, რომ მსგავსი შემთხვევები არსებობს და თუ არ მოიხსნება, ისინი 1000 ლარით დაჯარიმდებიან. წესით მსგავსი ფაქტების მოკვლევას „თავისუფლების ქარტიის“ კომისია უნდა ახორციელებდეს,“ – განმარტა გიორგი კლდიაშვილმა რედაქციასთან.



[თაკო ფეიქრიშვილი, ბორჯომი]