მუნიციპალიტეტების ნაწილმა, სუს–ის დავალებით, საბჭოთა სიმბოლიკების მოკვლევა დაასრულა

შემორჩენილი საბჭოთა სიმბოლიკების შესახებ „სამხრეთის კარიბჭემ“ სამცხე–ჯავახეთის ექვსივე მუნიციპალიტეტის მერიიდან ინფორმაცია წერილობით გამოითხოვა. მათ სახელმწიფო უსაფრთხოების სამსახურიდან აღნიშნული საკითხის მოკვლევა ივლისში დაევალათ.

ნინოწმინდის მერიიდან მიღებულ წერილში ვკითხულობთ, რომ მათ მუნიციპალიტეტში საბჭოთა სიმბოლიკები შემორჩენილი არაა. ახალქალაქის მერიიდან კი საჯაროდ გამოთხოვილ ინფორმაციაზე პასუხი ვერ მივიღეთ. მუნიციპალიტეტში სატელეფონო საუბარში გვითხრეს, რომ „წერილზე გვიპასუხებდნენ“, თუმცა, 3 აგვისტოდან დღემდე რედაქციას საჯარო ინფორმაცია არ მიუღია.

ახალციხის მერის ინფორმაციით, საბჭოთა სიმბოლიკა შემორჩენილი მხოლოდ ერთ ადგილზე, სოფელ მუგარეთშია: „შინ მოუსვლელთა მემორიალზე სტალინის გამოსახულება ფიქსირდება“.

ასევე, მხოლოდ ერთი საბჭოთა სიმბოლიკაა ბორჯომის მუნიციპალიტეტშიც: „ასეთი სიმბოლიკა რუსთაველის მოედანზე არსებულ ყოფილ ადმინისტრაციულ შენობაზეა“, – ვკითხუოლბთ მერიიდან მიღებულ წერილში.

ადიგენის მერიაში აცხადებენ, რო მათ ჯერ მოკვლევა არ დაუსრულებიათ. ასპინძის მერიაში კი შესწავლა არც კი დაუწყიათ.
„არ გვყავს კომპეტენტური კომისია, რომელიც შეაფასებს თუ რა ითვლება ტოტალიტარული იდეოლოგიის მატარებლად, მოკვლევაც ამიტომ არ დაგვიწყია“, – ამბობს ასპინძის მუნიციპალიტეტის მერი როსტომ მაგრაქველიძე.

მუნიციპალიტეტების მერიებში აცხადებენ, რომ მათ სუს–სგან საბჭოთა სიმბოლიკების დემონტაჟთან დაკავშირებით მითითება არ მიუღიათ.
„მუნიციპალიტეტი თავის საქმიანობას საბჭოთა სიმბოლიკებთან დაკავშირებით განახორციელებს საქართველოს კანონის „თავისუფლების ქარტიის“ მე–7 მუხლით განსაზღვრული უფლებამოსილების ფარგლებში“, – გვწერს ბორჯომის მერი ლევან ლიპარტია.

საქართველოს კანონის, „თავისუფლების ქარტიის“ მე–7 მუხლი კი საბჭოთა ტოტალიტარული და ფაშისტური იდეოლოგიების და პროპაგანდის აკრძალვის მიზნით სუს–ში კომისიის შექმნას ითვალისწინებს: იმ შემთხვევაში, თუ კომუნისტური ტოტალიტარული და ფაშისტური იდეოლოგიების მატარებელი სიმბოლიკის, ძეგლების, ბარელიეფების, წარწერების, სახელწოდებების აღმოფხვრის მიზნით კომისია მიმართავს უფლებამოსილ პირს (სახელმწიფო უსაფრთოხების სამსახურის უფროსს), უფლებამოსილი პირი ვალდებულია აღმოფხვრას კომუნისტური ტოტალიტარული ან/და ფაშისტური სიმბოლიკა.

2011 წლის კანონი „თავისუფლების ქარტია“ საჯარო სივრცეში საბჭოთა ტოტალიტარულ და ფაშისტურ სიმბოლიკას, საკულტო ნაგებობებს, ძეგლებს, მონუმენტებს, ბარელიეფებს, წარწერებს, ასევე, ქუჩების, მოედნების, სოფლებისა და დაბების სახელწოდებებს კრძალავს. აკრძალვის მიუხედავად კი საბჭოთა ძეგლები და ტოტალიტარული სიმბოლიკა, სამცხე–ჯავახეთის სოფლებში, დამოუკიდებლობის ხელახალი მოპოვებიდან 27 წლის შემდეგაც გვხვდება.

[ავთო ინასარიძე, ახალციხე]