სუს–მა სამცხე–ჯავახეთში საბჭოთა სიმბოლიკების შესწავლა დაიწყო

ამის შესახებ უწყებამ „სამხრეთის კარიბჭეს“ წერილობით აცნობა.

„საქართველოს ზოგიერთ რაიონში კომუნისტური ტოტალიტარული იდეოლოგიის მატარებელი ძეგლების არსებობასთან დაკავშირებით, „თავისუფლების ქარტია“ საქართველოს კანონით განსაზღრულმა კომისიამ, საკითხის სრულყოფილად შესწავლის მიზნით მიმართა შესაბამის თვითმმართველობის ორგანოებს“, – ნათვამია წერილში.

სახელმწიფო უსაფრთხოების სამსახურმა მუნიციპალიტეტების მერიებს „სამხრეთის კარიბჭიდან“ შესული ინფრომაციის საფუძველზე მიმართა. რედაქციამ, რეგიონში შემორჩენილი საბჭოთა სიმბოლიკების შესახებ სტატია სათაურით – „სტალინის ძეგლები და მონუმენტები - აკრძალული საბჭოთა სიმბოლიკა სამცხე–ჯავახეთში“ ერთი თვის წინ გამოაქვეყნა.

ახალციხის, ადიგენისა და ასპინძის მერიებში აცხადებენ, რომ მათ სუს–სგან წერილი უკვე მიიღეს და პასუხებს ამზადებენ.

„გვთხოვენ მოგვაწოდეთ ინფორმაცია ამ სიმბოლოებთან დაკავშირებითო და პასუხს აუცილებლად გავცემთ“, – ამბობს ადიგენის მუნიციპალიტეტის მერიის ინფრასტრუქტურის სამსახურის უფროსი გოდეძი სხირტლაძე.

აპინძის მუნიციპალიტეტის მერის მოადგილის ლევან ბერიძის თქმით, წერილში სიმბოლოების მოხსნასთან დაკავშირებით საუბარი არ არის: „სხვა თუ რაიმე გაინტერესებთ წერილობით მოგვმართეთ და გიპასუხებთ“.

მიღებული წერილის შინაარსზე არც ახალციხის მერიაში საუბრობენ, თუმცა, ამბობენ, რომ პასუხს უკვე ამზადებენ.

2011 წლის კანონი „თავისუფლების ქარტია“ საჯარო სივრცეში საბჭოთა ტოტალიტარულ და ფაშისტურ სიმბოლიკას, საკულტო ნაგებობებს, ძეგლებს, მონუმენტებს, ბარელიეფებს, წარწერებს, ასევე, ქუჩების, მოედნების, სოფლებისა და დაბების სახელწოდებებს კრძალავს. აკრძალვის მიუხედავად კი საბჭოთა ძეგლები და ტოტალიტარული სიმბოლიკა, სამცხე–ჯავახეთის სოფლებში, დამოუკიდებლობის ხელახალი მოპოვებიდან 27 წლის შემდეგაც გვხვდება.

[თამუნა უჩიძე, ახალციხე]