ბაკურიანში წყლით მომარაგება აღდგა

საქართველოს გაერთიანებული წყალმომარაგების კომპანიის, სამცხე-ჯავახეთის ფილიალის მენეჯერი, ბესო ფიალური აცხადებს, რომ ბაკურიანში წყლის პრობლემა მოგვარებულია.

„დაახლოებით ხუთი დღე არ გვქონდა წყალი და უკვე აღდგა“, - გვითხრა სასტუმრო მგზავრების მეპატრონემ ნატა ოქროპირიძემ.

ხუთი დღე არ ჰქონდა წყალი სასტუმრო „ბაკურიანი ჰაუსსაც“.

„წყალი მოგვეწოდება უკვე და პრობლემა აღარაა“, - ამბობს სასტუმროს ადმინისტრატორი ნინო ბიწაძე.

წყალმომარაგების კომპანიის ინფორმაციით, 31 დეკემბრიდან ბაკურიანში წყლის პრობლემა აბონენტების 20%-ს შეექმნა. ამის შემდეგ, 10%-ს წყალი განრიგით, დანარჩენ 10%–ს კი სპეციალური მანქანებით მიეწოდება.

წყალმომარაგების კომპანიის პირველ განცხადებაში, რომელიც ორ იანვარს გავრცელდა, ეწერა, რომ „წყლის გაზრდილმა მოხმარებამ, წნევის ვარდნა გამოიწვია, რამაც წყლის სტაბილური მიწოდება შეაფერხა“. გარდა ამისა, განცხადებაში ნათქვამი იყო, რომ იმ დროისთვის, ბაკურიანს წყალი სტაბილურად მიეწოდებოდა.

ცხრა დღის განმავლობაში წყლის პრობლემა ჰქონდა სასტუმროებს „რუმსს“ „მგზავრებს“ და „პანორამას“, ასევე წაქაძისა და აღმაშენებლის ქუჩების ნაწილს.

მოგვიანებით სპეციალური განცხადება გაავრცელა ენერგოომბუდსმენმაც, სადაც წყალმომარაგების კომპანიას მობილიზაციისკენ მოუწოდა.

ექვს იანვარს პრემიერ-მინისტრმა წყლის პრობლემის გამო საგანგებო შეხვედრა გამართა, სადაც პრობლემის დროულად აღმოფხვრაზე ისაუბრეს.

შვიდ იანვარს წყალმომარაგების კომპანიის დირექტორმა, ეკა გალდავამ თანამდებობა დატოვა. ახალ დირექტორად კი გრიგოლ მანდარია დაინიშნა.

[მარიამ ბარძიმაძე, ბორჯომი]