ენერგოომბუდსმენი: მძიმე პირობებია კურორტებზე, ამიტომ ტურისტები და დამსვენებლები ტოვებენ

"ზამთრის კურორტების წყალმომარაგების შესახებ 31 დეკემბერს ენერგოომბუდსმენის სამსახურში დაფიქსირდა არაერთი შეტყობინება გუდაურიდან და ბაკურიანიდან, რომლის მიხედვით, ორივე ზამთრის კურორტზე დაფიქსირდა წყალმომარაგების მასობრივი შეზღუდვა. როგორც ცნობილი გახდა, აღნიშნული პრობლემის გადჭრა ვერ მოხერხდა მყისიერად და ის დღემდე გრძელდება. აღნიშნულის გამო, მძიმე პირობებია შემქნილი კურორტებზე, ამიტომ ტურისტები და ადგილობრივი დამსვენებლები ტოვებენ აღნიშნულ სოფლებს. ცნობილია, რომ შპს”საქართველოს გაერთიანებული წყალმომარაგების კომპანია" აქტიურად ახორციელებს ტექნიკურ სამუშაოებს, თუმცა პრობლემის ძირეული აღმოფხვრა ვერ მოხერხდა", – წერია განცხადებაში.

ენერგეოომბუდსმენი ახსნა-განმარტებისთვის მიმართავს კომპანიას და მიღებული ინფორმაცია დეტალურად გაანალიზდება საქართელოს ენერგეტიკისა და წყალმომარაგების მარეგულირებელი ეროვნულ კომისიასთან ერთად.

"უნდა აღვნიშნოთ, რომ ზამთრის კურორტებზე ინფრასტრუქტურა მომზადებული უნდა იყოს ცივი სეზონის დაწყებამდე რამდენიმე თვით ადრე და მსგავსი პრობლემის წინაშე არ უნდა დადგეს მოსახლეობა სწორედ პიკურ მომენტში. აღნიშნული მიანიშნებს კომპანიის უპასუხისმგებლო დამოკიდებულებაზე, რაც მიუღებელია და ენერგოომბუდსმენი შპს “გაერთიანებული წყალმომარაგების კომპანიას” მობილიზაციისკენ მოუწოდებს. ამასთანავე, თითოეულ კომპანიას მიმართავს რეკომენდაციით, გააუმჯობეს მომსახურება, რათა თავიდან ავიცილოთ მომხმარებელთა უფლებების მასობრივი დარღვევა".

ბაკურიანსა და გუდაურში წყლის მიწოდების პრობლემა რამდენიმე დღის წინ შეიქმნა. ქვეყნის მთავარ კურორტებს ამ დრომდე წყალი შეფერხებით მიეწოდება.

შპს “გაერთიანებული წყალმომარაგების კომპანიამ” დღეს, სამ იანვარს განაცხადა, რომ ორდღიანი მუშაობის და რეზერვუარების შევსების შემდეგ ბაკურიანს ძირითად ნაწილს წყალი უკვე სტაბილურად მიეწოდება. დარჩენილ ორ ქუჩაზე აღდგენითი სამუშაოები მიმდინარეობს.

რაც შეეხება გუდაურს, წყლის დამატებითი მარაგის მოპოვების, დებიტის გაზრდის მიზნით და ახალი წყაროს დასაერთებლად მილის გაყვანა მიმდინარეობს. წყალი არ მიეწოდება ე.წ რედკოს დასახლებას.

[sknews.ge]