ახალქალაქში სიების გადამოწმებას არ ჩქარობენ

საარჩევნო სიების დაზუსტება წელს თავად ამომრჩევლების პრეროგატივაა. მათ ამომრჩევლის სახელობითი, მათ მისამართზე რეგისტრირებული ფურცლები უკვე დაურიგეს, ახლა მოქალაქეებმა თავად უნდა დააზუტონ, არიან თუ არა სიაში.

ამომრჩევლის ბარათების დარიგება, ახალქალაქის საარჩევნო ოლქში, 24 სექტემბერს, სიების შემოწმება კი 11 ოქტომბერს დაიწყო. ამ დროის განმავლობაში ყველამ, ვინც სიაში არ იყო, შეძლო ამომრჩევლის უფლების აღდენა. თუმცა სიაში შესწორების შეტანის თხოვნით საარჩევნო ოლქს მხოლოდ ათმა ადამიანმა მიმართა.

„ეს ის სიაა, რომელმაც ჩვენამდე მოაღწია და ჩვენც იუსტიციაში გავგზავნეთ. ძირითადად ესაა ხალხი, ვინც ბოლო პერიოდში დაოჯახდა და პასპორტის გამოცვლა ვერ მოასწრო“, - ამბობს საოლქო კომისიის თავმჯდომარე ჰასმიკ მარანგოზიანი.

#67 საარჩევნო უბანში, სადაც 1067 ამომრჩეველია, შესამოწმებლად არავინ მისულა.

„კომისიის წევრებმა ფურცლები სახლებში დავალაგეთ, გავნაწილდით და ქუჩებში დავარიგეთ. ჯერჯერობით არავის მოუმართავს“, - ამბობს #67 უბნის თავმჯდომარე ვერა ხაჩატრიანი.

ამომრჩეველები არც პირველ უბანზე აქტიურობენ.

„ხალხი 2-3-ჯერ მოვიდა, დაგვხედეს და წავიდნენ. ისინი ჩვენს უბანზე მათი გვარების არსებობას ამოწმებდნენ. არის ხალხი, ვინც არ იცის, რომელ უბანზე უნდა მისცეს ხმა. ჯერჯერობით სიაში გვარის არარებობის გამო არ მოუმართვთ“, - ამბობს უბნის თავმჯდომარე ლუსინე ჰაკოფიანი.

#40 ახალქალაქის საარჩევნო ოლქში 70 საარჩევნო უბანია: 7 ქალაქში და 63 სოფლებში. ოლქში 40,485 ამომრჩეველისა რეგისტრიებული. საოლქო კომისიაში ამბობენ, რომ სიებში ბევრი ისეთი მოქალაქეა, რომლებიც რუსეთში არიან. რადგან იქ საარჩევნო უბნები არ გაიხსნება, თუ არჩევნებამდე ჩამოსვლა ვერ მოასწრეს, ეს ამომრჩევლები მოქალაქეობრივ ვალს ვერ შეასრულებენ.

[შუშან შირინიანი, ახალქაალაქი]