ახალციხის ოლქში ამომრჩეველთა რაოდენობამ იკლო

#37 ახალციხის საოლქო საარჩევნო კომისიის თავმჯდომარე თეა გავაშელი ამბობს, რომ გასულ წელთან შედარებით, ახალციხის საარჩევნო ოლქში წლევანდელი, 27 ოქტომბრის საპრეზიდენტო არჩევნებისთვის, ამომრჩეველთა რაოდენობა გაცილებით ნაკლებია.
თუ მაგალითად, საპარლამენტო არჩევნებში 37 704 ამომრჩეველი იყო რეგისტრირებული, წელს ეს ციფრი 35 120-თ განისაზღვრება.

ამომრჩეველთა ერთიან სიაში, გამონაკლისი შემთხვევების გარდა, ცვლილებები აღარ შევა.

#37 ახალციხის საოლქო საარჩევნო კომისიაში საარჩევნო სიებში შესწორების შეტანის მოთხოვნით ამ დრომდე 162 განაცხადია შესული.

„ჩვენთან შემოსულია ისეთი განცხადებები, როგორიც არის ამომრჩევლის უბიდან უბანზე გადაყვანა. ორი წყალთბილა გვაქვს, სომხური და ქართული, ერთი 25-ე და მეორე მე-12 უბანია. ორ ამომრჩეველს პირადობებში უწერიათ წყალთბილა, ამიტომ რაღაცეები აირია და საჭირო გახდა ამომრჩევლების ერთი უბნიდან მეორეზე გადაყვანა“,- ამბობს თეა გავაშელი.

მისივე თქმით, იყო რეგისტრაციიდან მოხსნილი მოქალაქეების განცხადებებიც. საოლქო კომისიამ 162 განცხადებიდან მხოლოდ ორი ამომრჩევლის განცხადება არ დააკმაყოფილა: „ერთი არ იყო საქართველოს მოქალაქე და მეორე მეპატრონის მიერ საკუთრებიდან იყო ამოწერილი“.

ცენტრალური საარჩევნო კომისიის მონაცემების თანახმად, საქართველოში ამომრჩეველთა საერთო რაოდენობა 3 537 719-ს შეადგენს.
ეს მონაცემი 76 132-ით ნაკლებია გასული წლის საპარლამენტო არჩევნებში მონაწილეთა რაოდენობაზე. სხვაობას ხელისუფლება მოქალაქეების რეგისტრაციიდან მოხსნას უკავშირებს.

ცესკოს მონაცემებით, სამცხე–ჯავახეთის რეგიონში - 149 285 ამომრჩეველია;.

ახალქალაქი – 39 545
ახალციხე – 35 120
ბორჯომი – 27 427
ნინოწმინდა – 21 689
ადიგენი – 15 648
ასპინძა – 9 856

[მანანა სარაშვილი, ახალციხე]