ადიგენის 2020 წლის ბიუჯეტი რვა მილიონ ლარზე მეტია

ადიგენის ბიუჯეტის პროექტი თავდაპირველად დაახლოებით ექვს მილიონ-ნახევრით დაიგეგმა, განხილვის პერიოდში კი თანხა ორი მილიონით გაიზარდა.

საბოლოოდ, ადგილობრივი ბიუჯეტი 8 644 100 ლარით დამტკიცდა, თუმცა პრიორიტეტები იგივე დარჩა.

„დამტკიცდა უკვე ბიუჯეტი. ატვირთული არ არის მაცნეზე, იმიტომ, რომ გამოქვეყნებასაც აქვს თავისი ვადა, 4-5 დღე. საკრებულოს ჰქონდა გარკვეული შენიშვნები, რომლებიც ძირითადად სოციალურ დამხარებას ეხებოდა და გაითვალისწინეს“, - ამბობს საკრებულოს აპარატის უფროსი, მიხეილ ბუსხრიკიძე.

ბიუჯეტის პირველად ვერსიასთან შედარებით, საბოლოო დოკუმენტში თანხა გაიზარდა ინფრასტრუქტურის, მერიისა და საკრებულოს საქმიანობის უზრუნველყოფისა და განათლების მუხლებში, ხოლო კულტურა, ახალგაზრდობა და სპორტის, ასევე მოსახლეობის ჯანმრთელობის დაცვა და სოციალური უზრუნველყოფის მუხლებში თანხა შემცირდა.

თანხა გაიზარდა

- ინფრასტრუქტურის განვითარების მუხლი, თანხა გაიზარდა 2 207 600 ლარით, საბოოლოოდ განისაზღვრა - 4 382 200 ლარი;

- მმართველობითი და საერთო დანიშნულების ხარჯები, რომელშიც მოიაზრება მერიისა და საკრებულოს უზრუნველყოფა - თანხა გაიზარდა 10 700 ლარით, სულ შეადგინა - 2 304 700 ლარი;

- დასუფთავება და გარემოს დაცვის მუხლში თანხა უცვლელია - 401 900 ლარი;

- განათლების მუხლი, თანხა გაიზარდა 40 000 ლარით და სულ შეადგინა - 652 100 ლარი;

თანხა შემცირდა

- კულტურა, ახალგაზრდობა და სპორტის მუხლში 1 873 100 ლარით, სულ შეადგინა - 420 900 ლარი;

- მოსახლეობის ჯანმრთელობის დაცვა და სოციალური უზრუნველყოფის მუხლში თანხა შემცირდა 20 000 ლარით და სულ დარჩა 482 300 ლარი.

ადიგენის მუნიციპალიტეტის 2020 წლის ბიუჯეტი საკრებულოს დეპუტატებმა 23 დეკემბერს, რიგგარეშე სხდომაზე დაამტკიცეს.

[თაკო ფეიქრიშვილი, ადიგენი]