რაში დაიხარჯება ახალციხის ბიუჯეტი 2017 წელს

24 ნოემბერს, ქალაქ ახალციხის მთავარი ფინანსური დოკუმენტის პროექტის საჯარო განხილვა მოეწყო. საკრებულოს თავმჯდომარემ დავით ლომიძემ შეხვედრაზე ის მიმართულებები ჩამოთვალა, რაზეც 2017 წლის ბიუჯეტში შედარებით მეტი თანხა გაიწერა.

ახალციხის 2017 წლის ბიუჯეტის პროექტი 7.908.000 ლარიათ განისაზღვრება. პროექტიდან ჩანს, რომ მომავალი წლის ბიუჯეტში პრიორიტეტული ინფრასტრუქტურა და ჯანდაცვაა.

„ჯანდაცვისა და სოციალური პროგრამა ერთ–ერთი საუკეთესოა რეგიონში. ამ მხრივ მხოლოდ ბორჯომი გვჯობია, მათ მეტი ფინანსები აქვთ“, – განაცხადა დავით ლომიძემ.

მისივე თქმით, გასულ წელთან შედარებით, ჯანდაცვისა და სოციალური უზრუნველყოფის მუხლში თანხა გაზრდილია: „2016 წელს 398.000 ლარი იყო, 2017 წლის ბიუჯეტის პროექტში კი 484.700 ლარია. წელს პირველად დავაფინანსებთ მოქალაქეების სამედიცინო გამოკვლევებს, რისთვისაც 30.000 ლარია ამ ეტაპისთვის. თუ საჭირო გახდება, თანხა გაიზრდება“.

მერიაში ამბობენ, რომ 2017 წელს საკრებულოსა და მერიის ადმინისტრაციული ხარჯი შემცირდება, თუ 2016 წელს 2,693,200 ლარი იყო, 2017 წელს 1,895,000 ლარი იქნება. დაზოგილი თანხა ინფრასტრუქტურის მოწესრიგებას მოხმარდება.

„როდესაც საკრებულოში მოვედი, ბიუჯეტი დამტკიცებული იყო და ვერ შევძელი გარკვეული ხარჯები შემემცირებინა, მაგრამ რიგ საკითხებში ეკონომია გავაკეთე. 2017 წელს კი საკრებულოს ხარჯი 126,000 ლარით შემცირდა“, – განაცხადა დავით ლომიძემ.

მომავალი წლის ბიუჯეტში ინფრასტრუქტურული პროექტებისთვის 1,644,000 ლარია გათვალისწინებული. მერიის ცნობით, რეგიონული განვითარების ფონდიდან დაახლოებით 2,250,000 ლარი გამოიყოფა, თუმცა, ეს საბოლოო ციფრი არ არის: „ბევრი რამ ჩვენს აქტიურობაზე იქნება დამოკიდებული, შეიძლება 5 მილიონამდეც გავზარდოთ დაფინანსება“.

[თინათინ ზაზაძე, ახალციხე]