‘რუსული მხარე თანახმაა’ – როდის ჩამოვა ახალციხეში 50 ახალგაზრდა

ფოტო - ახალი ამბების ფრონტი

ორგანიზაციის „სახალხო დიპლომატია საზღვრების გარეშე“ ხელმძღვანელი და ახალციხის გამგებლის ყოფილი მრჩეველი გოჩა პარუნაშვილი აცხადებს, რომ მათ მოწვევას რუსული მხარე დაეთანხმა და უკვე კონკრეტული მოლაპარაკებები მიმდინარეობს. მისივე თქმით, პროექტის განხორციელბას გაზაფხულზე გეგმავენ, დეტალების შესათანხმებლად კი მან ვიზა მიიღო.

„იდეის დაანონსებიდან ერთი კვირის შემდეგ მოვიდა დასტური, სადაც ეწერა, მივესალმებით სახალხო დიპლომატიის კუთხით, საქართველოს მხრიდან მსგავსი ნაბიჯების განხორციელებასო. მომივიდა უკვე ვიზა ადმინისტრაციიდან და ახალი წლების შემდეგ ოფიციალურად მივდივარ რამდენიმე საკითხის შესათანხმებლად. შეხვედრა იქნება ტურიზმის ფედერალური სააგენტოში, იმიტომ, რომ ტურისტულად უნდა მოხდეს მათი შემოსვლა, ასევე გარკვეული ტურისტული მარშრუტი უნდა შევთავაზოთ და მე მინდა გავარკვიო, აქედან წასული ბავშვების გადაადგილების მარშრუტიც, რა პირობებში სად და როგორ იქნებიან. ამიტომ იქ ადგილზე უნდა გავიაროთ ეს საკითხები“, - ამბობს პარუნაშვილი.

მისივე თქმით, ორგანიზაცია პარალელურად მუშაობს სხვა საკითხებზეც. როგორიც არის ექიმ ვაჟა გაფრინდაშვილის გათავისუფლება. პარუნაშვილი ამბობს, რომ მათი ორგანიზაცია და პუტინთან დაახლოებული პირი, ვლადიმერ ხომერიკი, რომელიც „რუსი და ქართველი ხალხის ერთიანობის ფონდის“ პრეზიდენტია ერთობლივად ცდილობენ ამ საქმის მოგვარებას.

„ვლადიმერ ხომერიკთან ერთად, რომელსაც მოსკოვთან აქვს კავშირები და ოსეთის მხარესთან, მიდის სარიოზული მოლაპარაკება და სახალხო დიპლომატია სწორედ მაგას ემსახურება. ჩვენ გვქონდა მოლაპარაკება და ცოტა ადრე უნდა გამოსულიყო გაფრინდაშვილი, თუმცა რაღაცა მოხდა, რაც გაურკვეველია ჩვენთვის, მაგრამ გუშინ დაგვიდასტურეს რომ სავარაუდოდ, ახალი წლისთვის ვაჟა გაფრინდაშვილი საქართველოში დაბრუნდება“.

ორგანიზაციაში გეგმავენ, რომ ახალციხის სოფლებში შეხვედრები გამართონ, სადაც მოსახლეობაში არსებული პრობლემების შესახებ ისაუბრებენ და მათი გადაჭრის გზებსაც დასახავენ: „რადგანაც რამდენიმე ახალი, აქტუალური საკითხი იყო, ჩვენ არ გავსულვართ სოფლებში მოსახლეობასთან შესახვედრად, თუმცა ვგეგმავთ გასვლას და გვაინტერესებს პრობლემური საკთხები, რაც შეეხება ჩვენს რეგიონს, რუსეთთან შრომით ურთიერთობას და ა.შ. რომ დამყარდეს ტოტალური ურთიერთობა. ომი და უბედურება არავის სჭირდება და მე ვფიქრობ, რომ ასეთი ურთიერთობა ამ ყინულის ლღობას ხელს შეუწყობს“, - ამბობს გოჩა პარუნაშვილი.

ორგანიზაცია „სახალხო დიპლომატია საზღვრების გარეშე“ ახალციხეში ოქტომბერში ჩამოყალიბდა. ორგანიზაციის წევრები ამბობენ, რომ მათი მთავარი მიზანი ქართულ-რუსული ურთიერთობების აღდგენაა.

ასევე ნახეთ:

‘ეს არის კრემლის ინტერესები’ - შეფასებები ახალციხეში შექმნილ ორგანიზაციაზე

გამოკითხვა: უნდა იქმნებოდეს თუ არა რეგიონში პრორუსული ორგანიზაციები

‘ამით ‘სუსი’ უნდა დაინტერესდეს’- ომბუდსმენი ახალციხეში პრორუსულ ორგანიზაციებზე

[თაკო ფეიქრიშვილი, ახალციხე]