‘თავისუფლება ვაჟა ექიმს’ - ახალციხეში ადვოკატებმა აქცია გამართეს

ექიმ ვაჟა გაფრინდაშვილის მხარდასაჭერად ახალციხეში ადვოკატებმა მდუმარე აქცია 11:00 საათზე გამართეს. ისინი მიიჩნევენ, რომ გაფრინდაშვილი უკანონო პატიმარია და დაუყოვნებლივ უნდა გათავისუფლდეს.

„მცოცავი ოკუპაციის შედეგია ეს ყველაფერი, საქართველოს ეს საზღვრები აღიარებული საერთაშორისო თანამეგობრობის მიერ, ამიტომ ვაჟა გაფრინდაშვილს ჩვენი შეხედულებით დანაშაული არ ჩაუდენია. ზოგი თვლის, რომ მან დაარღვია საზღვარი. ის არის ექიმი და თავისი პროფესიული მოვალეობის შესასრულებლად მიმდიოდა და მიუღებელია მისი დაკავება და ამდენი ხნის განმავლობაში დატოვება უკანონო პატიმრონბაში“, - განაცხადა ადვოკატმა შალვა გოგოლაძემ.

ახალციხეში მდუმარე აქციას ორგანიზება ადვოკატთა ასოციაციამ გაუწია: „თბილისში ჩვენი კოლეგები მართავენ ანალოგიურ აქციას და ჩვენ მხარდაჭერას ვუცხადებთ. ვიზიარებთ აქციის შინაარს მთლიანად და მხარს ვუჭერთ უკანონო პატიმარ ვაჟა გაფრინდაშვილს, მიგვაჩნია, რომ იგი დაუყოვნებლივ უნდა გათავისუფლდეს“, - ამბობს ადვოკატი ნუგზარ სამარჯიშვილი.

მისივე თქმით, ექიმებს საზღვრები არ აქვთ და გაფრინდაშვილი მხოლოდ საკუთარ მოვალეობას ასრულებდა - „ის საქართველოს ტერიტორიაა, ოკუპირებულია და კიდევ ერთი ის, რომ იგი ექიმია და ექიმებს საზღვრები არ აქვთ“.

დღესვე სოლიდარობის აქცია, ადვოკატთა ასოციაციის ინიციატივით თბილისსში, რიყის პარკშიც გაიმართა.

თბილისის ცენტრალური საავადმყოფოს ტრავმატოლოგ-ორთოპედი ვაჟა გაფრინდაშვილი საოკუპაციო ძალების წარმომადგენლებმა ცხრა ნოემბერს დააკავეს. მას ბრალი ედება ე.წ საზღვრის განზრახ დარღვევაში, რაც დე ფაქტო კანონმდებლობით სისხლის სამართლის დანაშაულია. მას შემდეგ რაც ცხინვალის დე-ფაქტო სასამართლომ ვაჟა გაფრინდაშვილს ორთვიანი პატიმრობა შეუფარდა, საქართველოს პრეზიდენტმა პრეზიდენტმა საერთაშორისო ორგანიზაციებს მიმართა. ექიმის მხარდასაჭერად განცხადება გაავრცელა აშშ-ს საელჩომაც.

22 ნოემბერს ვაჟა გაფრინდაშვილის უკანონო დაკავების თაობაზე იმსჯელეს ეუთოს მუდმივი საბჭოს სხდომაზეც. ასევე საქართველოს სხვადასხვა რეგიონში, მათ შორის სამცხე-ჯავახეთში, ვაჟა გაფრინდაშვილის გათავისუფლების მოთხოვნით „თეთრი ხალათების აქცია“ გაიმართა.



[თაკო ფეიქრიშვილი, ახალციხე]