სამცხე–ჯავახეთში ადვოკატის უფლებათა დაცვის კომიტეტი შეიქმნა

კომიტეტის მიზანია, საქართველოში მოღვაწე ადვოკატთა პროფესიული უფლებების ეფექტიანი დაცვა, მოქალაქეთათვის ხარისხიანი იურიდიული დახმარების უზრუნველსაყოფად. კომიტეტი ახორციელებს სხვადასხვა აქტივობებს იმისათვის, რომ ადვოკატთა ასოციაციამ მოახდინოს დროული და ეფექტიანი რეაგირება პროფესიული საქმიანობის განხორციელებისას ადვოკატის დაშინების, დაბრკოლების, ღირსების შელახვისა თუ არასათანადო ჩარევის ფაქტებზე.

შეხვედრა სამცხე–ჯავახეთის უნივერსიტეტის მეორე კორპუსში გაიმართა და მას საქართველოს ადვოკატთა ასოციაციის თავმჯდომარე დავით ასათიანი უძღვებოდა.

არ უნდა დარჩეს პასუხის გარეშე ადვოკატი უფებების დარღვევის არც ერთი ფაქტი. თითოეული ჩვენგანი ახერხებს ნებისმიერ გამოწვევას გასცეს პასუხი, მაგრამ ერთი ადვოკატის უფლების დარღვევა არის ყველა ადვოკატის უფლების დარღვევა, ასოციაცია ასე აღიქვამს ამას. ვეჭვობ რომ სამცხე–ჯავახეთში ადვოკატთა უფლებები არ ირღვეოდეს. დარწმუნებული ვარ კომიტეტის მოქმედების დაწყების შემდეგ ადგილობრივი კომიტეტი ბევრ დარღვევას აღმოაჩენს, შემდეგ ყველა რეგიონი ერთად დავდგებით და ამ დარღვევებს აღმოვფხვრით“,–თქვა ადვოკატთა ასოციაციის ადვოკატის უფლებათა დაცვის კომიტეტის თავმჯდომარე ონისე მარგიანმა.

რეგიონში შექმნილ კომიტეტს ჯერ ჯერობით თავმჯდომარე არ ჰყავს, მას თავად წევრები აირჩევენ.

„ეს ძალიან კარგი წამოწყებაა ადვოკატთა ასოციაციის, პირველ რიგში დაცული უნდა იყოს ადვოკატთა უფლებები რომ მოქალაქეებმა თავი მშვიდად იგრძნონ. საკუთარ თავზე მაქვს გამოცდილი 2014 წელს ადმინისტრაციული წესით დამაკავეს და მერე გავმართლდი, თუმცა საბოლოო რეზულტატისთვის ჯერ კიდევ არ მიმიღწევია. თუ იქნება ეს კომიტეტი და იფუნქციონირებს ბუნებრივია გაცილებით დაცული იქნება ადვოკატის უფლებები“,–ამბობს ადვოკატი ნუგზარ სამარჯიშვილი.

საათნახევრიან შეხვედრაზე ასოციაციის წევრი ადვოკატები, საქართველოს სხვადასხვა რეგიონიდან ესწრებოდნენ. კომიტეტში გაწევრიანება სხვა ადვოკატებსაც შეუძლიათ.

ადვოკატთა ასოციაციამ უკვე ჩამოაყალიბა კომიტეტი იმერეთში, აჭარაში, სამეგრელო–ზემო სვანეთსა და კახეთში.





[მარიამ ბარძიმაძე, ახალციხე]