სამცხე-ჯავახეთში ადვოკატის უფლებათა დაცვის კომიტეტს ნუგზარ სამარჯიშვილი უხელმძღვანელებს

კომიტეტის თავმჯდომარედ სამარჯიშვილი ოფიციალურად გუშინ, 25 დეკემბერს დანიშნეს.

„აქ დაახლოებით ერთი კვირის წინ ჩატარდა სხდომა. ადვოკატებმა ერთხმად ამირჩიეს, შემდეგ ოქმი საქართველოს ადვოკატთა ასოციაციაში გადაიგზავნა. ამ კომიტეტის შექმნა საჭირო იყო, რადგან საკუთარ თავზე მაქვს გამოცდილი. 2014 ადმინისტრაციული წესით დამაკავეს და მერე გავმართლდი. მალე ამოქმედდება ჩვენი ოფისიც, ჯერ წესდებას ველოდებით“, - ამბობს სამარჯიშვილი.

მისი თქმით, სამცხე-ჯავახეთის ადვოკატის უფლებათა დაცვის კომიტეტის ოფისი კოსტავას 18–ში იქნება [მერიის ყოფილი შენობა].
ადვოკატთა ასოციაციამ უკვე ჩამოაყალიბა კომიტეტი იმერეთში, აჭარაში, სამეგრელო–ზემო სვანეთსა და კახეთში.

კომიტეტის მიზანია, საქართველოში მოღვაწე ადვოკატთა პროფესიული უფლებების ეფექტიანი დაცვა, მოქალაქეთათვის ხარისხიანი იურიდიული დახმარების უზრუნველსაყოფად. კომიტეტი ახორციელებს სხვადასხვა აქტივობებს იმისათვის, რომ ადვოკატთა ასოციაციამ მოახდინოს დროული და ეფექტიანი რეაგირება პროფესიული საქმიანობის განხორციელებისას ადვოკატის დაშინების, დაბრკოლების, ღირსების შელახვისა თუ არასათანადო ჩარევის ფაქტებზე.

[მარიამ ბარძიმაძე, ახალციხე]