ასპინძის გოგრები [ფოტო]

ასპინძის სოფელ ნიჯგორში მცხოვრებმა ასპანიძეებმა განსაკუთრებულად დიდი ზომის გოგრები მოიყვანეს. მოსავალი ისე დაბინავდა, რომ ზამთარს გაუძლოს.

„საკმაოდ დიდი მოსავალი მოგვივიდა, მაგრამ, არც აზოტი გაგვიკეთებია და არც სხვა რამე პრეპარატი. ასეთი ჯიშია თვითონ, დიდები იზრდება. ტურისტებისთვის განსაკუთრებით საინტერესოა. სასარგებლო პროდუქტია და საკვებად ვიყენებთ“, - ამბობს ციცო ასპანიძე.

მესხეთის ზოგიერთ სოფელში გოგრას აყიროსაც უწოდებენ. სხვა კუთხეებში კი მისი კიდევ ერთი სახელი – კვახია გავრცელებული.

ზამთრის ცივ დღეებში მესხები გოგრისგან ტრადიციულ შეჭამანდს ამზადებენ, რომელიც ასევე სასარგებლოა.

გოგრა დიდი რაოდენობის ვიტამინებსა და მინერალებს შეიცავს. მასში ბევრია კაროტინი, გაცილებით მეტი, ვიდრე სტაფილოში. შეიცავს დიდი რაოდენობით რკინას, რაც სისხლძარღვოვანი სისტემის მუშაობას აუმჯობესებს. ვიტამინ კარნიტინის შემცველობის გამო, გოგრა აჩქარებს ნივთიერებათა ცვლას და გეხმარებათ ზედმეტი წონისგან განთავისუფლებაში. განსაკუთრებით სასარგებლოა მისი მიღება პატარა ბავშვებისთვის.





[თაკო ფეიქრიშვილი, ასპინძა]