თუთის ტყლაპი [ფოტო]

ციცო ასპანიძე ასპინძის სოფელ ნიჯგორში ცხოვრობს. თუთის ხეები ივლისში მოარხია, ნაყოფი აკრიფა და მისგან წვენი დაამზადა. ახლა, ოქტომბრის მზიან დღეებში, ამ წვენით ტყლაპებს ამზადებს, როგორც აქაურები ამბობენ „ტყლაპებს ასხამს“.

„სანამ კარგი ამინდებია ვცდილობ მოვასწრო. თუთა ივლისის ბოლოს შემოვიდა, მაგრამ მაშინვე ტყლაპების დასხმას რომ ვერ ვასწრებთ, წვენს ვაკეთებთ, ვინახავთ და შემდეგ ვხსნის იმ წვენს, ფქვილსა და შაქარს ვუკეთებთ, ვადუღებთ და ტყლაპებს ვასხამთ“, - ამბობს ციცო ასპანიძე.

თუთის წვენით, ფქვილით და შაქრით თხელ ფაფას ამზადებენ, შემდეგ სპეციალურად გამზადებულ ნაჭერზე ასხამენ.

ამისთვის ყველა სტრუქტურის ნაჭერი არ გამოდგება, ადგილობრივები ამბობენ, რომ ის ჩითის ნაჭერზე, როგორც თავად უწოდებენ „ამერიკაზე“ უნდა დაისხას.

„ამ პროცესს დაახლოებით ორი დღე სჭირდება. ერთ დღეს დავასხამთ ნაჭერზე და მზიანი ამინდი თუ იქნება, მეორე დღეს უკვე ვაძრობთ გამზადებულ ტყლაპს და ისევ მზეზე ვაშრობთ. ყველას ძალიან მოსწონს და გამვლელ-გამომვლელი ყველა აჩერებს ჩემს სახლთან“.

თუთის ტყლაპი ნიჯგორელებისთვის ერთ–ერთი შემოსავლის წყაროა. ადგილობრივებს ნუგბარის შესაძენად ხშირად აკითხავენ ტურისტებიც. ტყლაპის გარდა, აქ შეგიძლიათ თუთისგან მომზადებული ბაქმაზი და არაყიც შეიძინოთ.






ზუზი ბერიძის ფოტოები

[თაკო ფეიქრიშვილი, ასპინძა]