სახალხო დამცველი მეუფე თეოდორეს და გუბერნატორს შეხვდა

სამცხე-ჯავახეთის სახელმწიფო უნივერსიტეტში სტუდენტებთან შეხვედრის შემდეგ, სახალხო დამცველი უჩა ნანუაშვილი აპარატის სხვა წარმომადგენლებთან ერთად, ახალციხისა და ტაო-კლარჯეთის მიტროპოლიტის მეუფე თეოდორეს რეზიდენციას ესტუმრა, სადაც სოფელ მოხეში ბოლო პერიოდში მომხდარ მოვლენებზე ისაუბრეს.

შეხვედრა, ჟურნალისტებისთვის დახურულ კარს მიღმა, დაახლოებით ერთ საათს გაგრძელდა. სახალხო დამცველსა და მეუფე თეოდორეს დეტალებზე არც შეხვედრის დასრულების შემდეგ უსაუბრიათ. მათ მხოლოდ ის აღნიშნეს, რომ სადავო შენობასთან დაკავშირებული საკითხები მშვიდობიანი გზით უნდა მოგვარდეს.

„ჩვენ მაქსიმალურად შევეცადეთ, რომ მიგვეწოდებინა ის ინფორმაცია, რაც გაგვაჩნია რეგიონში ამ საკითხებთან დაკავშირებით. ძალიან საინტერესო და მრავლის მომცველი საუბარი გვქონდა“, - განაცხადა ჟურნალისტებთან ახალციხისა და ტაო-კლარჯეთის მიტროპოლიტმა მეუფე თეოდორემ.

სახალხო დამცველის უჩა ნანუაშვილის განმარტებით, მოხის სადავო შენობასთან დაკავშირებული პრობლემები უნდა მოგვარდეს. მისი მოგვარების ერთ-ერთ გზად კი ნანუაშვილს ადგილობრივების სოციალურ-ეკონომიკური მდგომარეობის გაუმჯობესება, ასევე მოსახლეობის ინტეგრაციის კუთხით მუშაობა მიაჩნია.

„ეს პრობლემები დიდიხანია არსებობს, უკვე წლებია, რასაც კიდევ ბევრი და თავისი მიზეზები აქვს. ამიტომ, ეს დეტალები კარგად უნდა იქნეს შესწავლილი და ისე უნდა ვიმუშაოთ“, - განაცხადა სახალხო დამცველმა.

ახალციხისა და ტაო-კლარჯეთის რეზიდენციაში სტუმრობის შემდეგ, უჩა ნანუაშვილმა სამცხე-ჯავახეთში ვიზიტი სამხარეო ადმინისტრაციაში სტუმრობითა და გუბერნატორთან აკაკი მაჭუტაძესთან შეხვედრით დაასრულა. მეუფე თეოდორესთან შეხვედრის მსგავსად, ეს შეხვედრაც დახურული იყო.

[sknews.ge]