ხატია პარუნაშვილმა მკურნალობა დაიწყო, თუმცა თანხა სრულად არ აქვს

ბოლო ორი დღის განმავლობაში, რაც 21 წლის ადიგენელი გოგონას მძიმე ჯანმრთელობის მდგომარეობის შესახებ გავრცელდა ინფორმაცია, მისი დახმარების სურვილი იურიდიულმა პირებმა და ფონდებმა გამოთქვეს.

სოციალური ქსელების მეშვეობით, უკვე ცნობილია, რომ ახალციხეში „ნამცხვრისა და პიცის სახლმა“, მაღაზია „ბიუთიმ“ და ბავშვთა გასართობმა ცენტრმა „ბეიბი ბუმმა“გამოთქვა სურვილი, შემოსავლის 2% გადარიცხოს ხატიას გადასარჩენად.

გარდა ამისა, ორგანიზაციის „ერთად შევძლებთ“ მიერ, სხვადასხვა ობიექტებში დადგმულ საქველმოქმედო ყუთებით შეგროვებული თანხა ხატია პარუნაშვილის ანგარიშზე ჩაირიცხება.

როგორც ხატია პარუნაშვილის და, მარიამ პარუნაშვილი ამბობს, დახმარების სურვილი გამოთქვა „დიმიტრი ცინცაძის ფონდმაც“: „ხატიას მეგობრებმა და თანამშრომლებმა მიმართეს სხვადასხვა ფონდებსაც. ამ დროისათვის, 3 000 დოლარია უკვე შეგროვებული, რომელიც უნდა გადავურიცხოთ საავადმყოფოს, რადგან უკვე დაიწყო მკურნალობის პროცესი და საავადმყოფომ მოგვცა უფლება, რომ თანხა ნაწილ–ნაწილ გადავიხადოთ“.

იმისათვის, რომ ხატია პარუნაშვილი გამოჯანმრთელდეს ქიმიოთერაპიის ოთხი კურსი სჭირდება, რაც ჯამში 72 000 დოლარი ჯდება.

21 წლის გოგონას მწვავე ლეიკემია ორი კვირს წინ დაუდგინდა. იმის გამო, რომ მის ოჯახს მკურნალობის სახსრები არ გააჩნია, ხატია პარუნაშვილის დასახმარებლად გახსნილია საბანკო ანგარიში:

საქართველოს ბანკი - ანგარიშის ნომერი GE34BG0000000161580664GEL
თიბისი ბანკი - ანგარიშის ნომერი GE31TB7146945061100061

მიმღები მარიამ პარუნაშვილი,

პირადი ნომერი 03001021441

[ლუბა გიორგაძე, ადიგენი]